#عادة_ديسمبر : التخيّل

سلامٌ على من اتبع الهُدى 

نيتي من هالتدوينة : اني افيد و استفيد 
اني اكون عضو فعّال في المجمع 
اني اشرّف كل من يعرفني 




يشاع عن علي رضي الله عنه انه قال " كل ما هو متوقع آت "

و بغض النظر عن قائل هذه العبارة ، إلا انها في محلها !

...

بغض النظر اذا كنتِ تؤمنين بقانون الجذب او لا ..
و بغض النظر شنو فلسفتك بالحياة

التخيّل/الخيال قوة لا يستهان بها 

عشان اثبت لكم : 

وقفِ !
اي وقفِ !!
ثبتِ رجولك على الارض و حركِ الجزء العلوي ( ايديك ) للوراء
كانك تلتفتين
احفظ النقطة الي وصلتِ لها
الحين
تخيّلي انك تسوين نفسك الحركة
خيال بس ..
بس تخلصين خيال ..
نفس الحركة سويها
انا مو عندك بس متاكدة ان المسافة الي وصلتِ لها هالمره كانت ابعد من النقطة التي قبلها

^ التمرين مو من اختراعي ، هو جدا معروف و الفضل ما ينسب لي ^^

الي لساتهم مشككين او لسى مو مقتنعين ليش اخترت شي مثل كذا
تفضلوا تفرجوا على هذا الفيديو
11:03 دقيقة

الرابط للي ما يفتح/يطلع معهم الفيديو :
http://www.youtube.com/watch?v=S5bvuj82l6o


شنو احلامك ؟!
طموحاتك ؟!ّ
رغباتك ؟!
الاشياء الي تحبها ؟!
^ مو الاشياء الي تحتاجينها
(هالنقطة تتعلق بكايزن )

الطريقة :

من الزمن تحتاجين ما بين ربع الى نص ساعة

لك ، لنفسك ، لجسدك ، لروحك ، لاعضائك
للمستقبل القريب و البعيد


1

عادة يفضل انك تكونين بمكان لحالك ، مكان هادئ
بالنسبة لي عندي قناعة .. العقل هو المسيطر : ممكن يتجاهل كل الظروف الي محيطه به اذا كان صاحبة مؤمن بالفكرة الي يحتاجها
^ مسألة تفضيل شخصي
انا اتخيل و انا بالباص بالطريق للجامعة ، و اكيد الباص مليان بنات و الشارع .. خلونا نقول مو صوت خرير او زقزقة عصافير ، و المطبات و البريك الي ينضرب فجأة
^ قصة حياتي :/



2

النية :  نيتك من هالتخيل شنو ؟!
انا لما اتخيل انوي اني احسن حياتي و اطور مهارة التخيل/الخيال عندي
خصوصا اني بالفترة الاخيرة كنت لما احاول اتخيل ما كنت اقدر :(

3

اربطِ خيالك باعضاء الحس الخمسة : شكله ( العين ) ،الرائحة ( الانف) ، الملمس ( الجلد ) ، الطعم ( اللسان ) ، الصوت ( الاذن )
احيانا م تقدرين تشملين الطعم :S

اربطِ خيالك بردة افعال الناس ، فرح .. غبطة .. رضا .. الخ
^ الافضل انك م تدخلين مشاعر سلبية بالموضوع

4

المدة الزمنية المستقبلية الي تتخلينها ممكن تكون بالمستقبل القريب :
في اليوم ، الاسبوع ، الشهر
او البعيد :
سنة قدام ، 5 سنوات

5

ابسط جزء : تخيلي !

تحبين انك تنحفين ؟!

تخيلي شكل الناس لما تشوفك ناحفة
ردة فعلهم .. كلامهم .. عباراتهم ..
" فلانة !!! .. معقول هذه انتِ ! "
" واو .. جسمك طالع خيال "
تخيلي تدخلين المحل و تلقين قطعة وحده بس من لباس صار لك فترة تدورين عليه
و الحين ما يهمك قياس القطعه لان كل شي صار يضبط عليك !
 تخيلي المساحة الفاضية من كرسي السيارة ، كنبة البيت ، سريرك .. إلخ


تحبين انك تاخذين دراجات عالية ؟!

تخيلي انك فاتحة الموقع  عشان تشوفين درجاتك
تخيلي تلقين كل مادة ماخذه فيها A+
ايواه A+ مو A و لا B+  و لا B
A+
تخيلي ردة فعلك .. الارض ما راح تاسعك
لو تعرفين تطرين كان طرتِ
تخيلي ردة فعل احبابك و اهلك
دكاترك اذا كنت تتواصلين معهم


تحبين تفتحين شركة خاصة فيك ؟!

تخيلي الشركة
الشعار/اللوقو
العملاء
الموظفين
المعاملات
مكتبك
المبنى
الناس و هي تهنيك ع الشركة
اسم شركتك في الجرايد و المجلات و التلفيزيون
يجرون معك مقابلة

.........................................................


مشاكل قد تواجهينها :

كومة افكار مو مرتبة و تاثر على تخيلك :

هذا شي طبيعي خصوصا اذا كنت توك بادية و/او كنت من النوع الي ما يفضفض كثير للناس
اسال نفسك " انا شنو قاعدة افكر ؟! "
تقبلي الافكار ،  شوفِ وين الفكرة بتوديك و بس تنتهي الفكرة حاولِ ترجعين للشي الي تبين تتخلينه
اذا رجعتِ و رجعت لك فكرة ثانية و ثالثة و رابعة لا تملين و استمري

اذا بعد كم جلسة حاسة ان الوضع مو قاعد يتحسن
هاتِ ورقة و قلم او المذكرة في الجوال و ابداِ اكتب افكارك
اكتبِ كل شي يخطر على بالك مهما كان بنظرك سخيف و غير مهم
اكتب لحتى ما تخلص الافكار
يكمن حتكتشفين شغلة كنتِ غافلة عنها


يجيني نوم لما اتخيل :

اما ان الهدف الي تخططين تتخلين له ما يسعدك ب درجة 200% !
او انك ما عرفتِ تختارين الوقت الصحيح !

اذا المشكلة الاولى اولياتك تحتاج تعديل
لا تتخلين شي تبينه يصير عشان شخص من الناس
الشي لازم يكون لك انت و انت بس !
الانانية في هالحاله حلوه

اتخيل بس مو مصدقة انو بيصير لي :

هذا يبي له قعدك مع نفسك
ليش تحسين انه م راح يصير لك ؟!
مسألة ثقة بالنفس ؟!
مسألة استحقاق ؟!
^ بمعنى انك ما تستاهلين/تستحقين الخير
او مسألة اعتقاد ب سوء/استحالة هالشي ؟!

اذا كان مشكلة اعتقاد حلها حبتين طويل و يحتاج موضوع لحاله :(
مو صعب الحل لكن يحتاج شغل ..


................................................


اشياء تعزز تخيلك :

... الصوّر ...
... الصوّر ...
... الصوّر ...

ما في شي احسن من الصور يعزز خيالك 

ممكن تشترين لك لوحة مثل كذا :



موجوده بجرير و ما استبعد تكون موجودة بمحلات مثل ساكو 

و تحطين عليها صوّر تعزز شعورك بالشي الي تبينه 
و كل يوم تشوفينها 
الطريقة هذه معروفة ب اسم vision board 
اي لوحة التخيّل 

.............................................


 اذا كنت تحبين خصوصيتك 
ممكن تستخدمين علبة او صندوق و تحطين فيه الصور 
و كل يوم تفتحين العلبة و تشوفينها 



و ما يمنع انك تستخدمين علبة فخمة و تدلعين حالك فيها 

..................................................


او اذا كنتِ مثلي ممكن تستخدمين جوالك 

اقصد انو تفتحين ملف بجوالك و تحطين فيه كل الصور الي تعزز شعورك 
و اما كل ما تصحين من النوم او قبل ما تنامين تشيكين عليه 
لكن 
اذا سويتِ هالطريقة انتبهي من تسميتك للملف 
مثلا اذا سميتيه " احلام " و انت عندي نوعا ما إيمان/اعتقاد ان الاحلام تبقى احلام 
ما تحقق !
م راح تطلعين بفايدة من الموضوع ! :/ 

...............................................


الصور ممكن تجيبينها من المجلات 
من التمبلر 
من قوقل 
من بنتريست 
من حيا الله مكان ..

...........................

شي من اهدافي

اختم كلامي بعبارة جميلة سمعتها مره و اذكر نفسي فيها كل يوم : 

" those who are certain of the outcomes can afford to wait and wait without anxiety " 

تعني :

" اولئك الواثقين من النتائج يستطيعون الانتظار ، و ينتظرون بدون قلق "


~ توافيق 


اذا في شيء اهملته تفضلِ بالسؤال هنا 

عشوائيات 

انطباعي : آلة الطباعة DESKJET 2050A من اتش بي
_____
و عسى هالعيد ما يحمل لقلوبكم غير افراحه ♥
_____
#عادة_ديسمبر : التخيّل
______
كيف تعلمت اللغة الانجليزية + نصائح
________
الحياة الجامعية
_____
التصميم الداخلي : minimalist الحد الادنى
_____

كيف تستفيد من معرض الرياض الدولي للكتاب

تويتر هنا
انستقرام هنا