سبق نشر هذه التدوينة في سبويلي 

ملف خاص : حبوب الظهر

ملف خاص : حبوب الظهر

اسباب حبوب الظهر 

قبل ما ابدا اذكر الاسباب ، حاولِ تتذكرين متى بدا معك الموضوع ؟!

كمان مهم انك تعرفين التاريخ العائلي … اقصد هل في احد بالعيلة صار لهم مثل ما يصير لك الحين ؟!

اذا شغلة بالعيلة لفترة معينة ، او الموضوع مستمر معهم

اذا فترة معينة متى هالفترة ؟ و قد ايش ؟

اذا مستمر معهم لحتى الان ، ايش العادات المشتركة بينكم ؟

– فترة البلوغ : 

للاسف فان فترة البلوغ فيها لخبطة هرمونات ، و كانو ما يكفي التغيرات الي تصير بجسمك جاية هالحبوب تعكر عليك

حاسة فيكم

–  شعرك 

شعرك طال ؟! اذا ايه يمكن هو السبب .. يمكن بسبب المنتجات الي تستخدمينها عليه سواء اثناء الاستحمام او بعده

استخدمتِ منتج جديد ؟! اذا اية يمكن هو السبب .. حاولِ لما تسخدمينة ما تخلين شعرك يجي على ظهرك ابدا ، يعني على طول بعد ما تحطين المنتج ارفعِ شعرك ، و اذا جيتِ تغسلين اما انك تغسلين و راسك مايل ( عذاب   ) او بعد ما تغسلين شعرك تغسل ظهرك زين

^ طبعا اذا المنتج مو قاعد يفيد شعرك او معطيك شي مميز ؛ اعطيه لاحد من اهلك

– اكلك 

بالرغم من ان الكلام الي راح اقوله يمكن مو منطقي ؛ لكن وقت ما كان فيني الحبوب لقيت ان احد الاسباب زيادة استهلاك الكربوهيدرات ، المشكلة مو الاستهلاك نفسه .. المشكلة في الزيادة !

اتوقع بسبب السكر ؛ و معروف عن السكر انه ياخر التئام الجروح و حتى حريم اول كانت الوحده لما تولد يحذرونها من الحلا

هل زادت كمية الكربوهيدات الي تاكلينها ؟! اذا ايه يمكن هو السبب

زيادة على كذا اذا عندك حساسية من القلوتين او حمض اللاكتوز او غيره … ممكن تضر لك الحساسية على شكل حبوب بالجسم. غالبية الناس ماخذين فكرة ان اللي عنده حساسية من مادة معينة يختنق اذا تناولها و هالشي مغلوط. ردة الفعل التحسسية تختلف من مادة ل مادة. تقدرين تعرفين اذا عندك حساسية او لا من منتجات معينة من اختبار يتم اجرائه في غالبية المستشفيات.

– الرياضة 

بداتِ نظام رياضي ؟! اذا ايه .. اول شي مبروك عليك

ثانيا حاولِ انك مجرد ما تخلصين من الرياضة تاخذين دوش … يمكن حتى تحتاجين تغيرين الغسول الي تستخدمينه لجسمك لواحد اقوى شوي و ما فيه مواد معطره كثير مثل ديتول

و طبعا شي بديهي ملابسك حتى الداخلية لازم تنغسل بعد كل تمرين

– الحلاقة

ممكن تكونين حلقتي المنطقة بطريقة خاطئة. الحلاقة وسيلة جبارة لكن اذا ما راعيتي بشرتك و اتبعتي الطريقة الصحيحة بشرتك ممكن تدخل حالة استنفار و تسبب ظهور حبوب.

– الحساسية التلامسية

هي حالة مرضية ، تعني ان بشرتك تتحسس من مواد معينة. نفس الاختبار المجرى لتحديد الحساسية من الطعام ينعمل هنا. وقتها النتجية تحدد ماذا اذا انت محتاجة تغيرين طبيعة حياتك او لا.

قواعد للتعامل مع حبوب الظهر 

هنا قواعد ضروري تتبعيها عشان تضمنين انها ما تزيد و ما ترجع لك و للناس الي ما صار لهم عشان ما تصير لهم وقاية يعني

– كل يوم تحممِ : 

حتى لو ما عرقتِ ، حتى لو ما فيك وصخ حتى لو ما ادري شنو فيه اسباب .. كل يوم تحممِ

– اتحممِ بماء بارد :

مو شرط بارد لدرجة انك تحسين انو ثلج ، لكن لا يكون دافي .. – انا حتى ما تكلمت عن الحار ! –

ليش ؟!

قال تعالى {ارْكُضْ بِرِجْلِكَ ۖ هَٰذَا مُغْتَسَلٌ بَارِدٌ وَشَرَابٌ  }

ايوب علية السلام كان مصاب ب امراض كثيرة من ضمنها الامراض الجلدية ، القران مو موجود عبث و القصص الي فيه مي موجودة بس للعضة و للعبرة .. موجوده عشان نستفيد منها و نطبقها بحياتنا

لسبب ما في قناعة ان الموية الحارة هي الي تنظف من قلب .. اوك هي تنظف الادوات من الجراثيم و الميكروبات بس وش ذنب جسمك يتحمل الدرجات العالية من الحرارة !

شخصيا عندي قناعة ان الماء الحار هو السبب الي خلاني اعاني من الحبوب ، لكن ما ذكرته في الاسباب لان ما عندي اي دليل علمي على الموضوع :/ او حتى احد نفس حالتي

– ملابسك و ملابسك الداخلية ما تلبسيها اكثر من 24 ساعة !

الملابس تتغير بشكل دوري و يومي

حتى لو ما عرقتِ حتى لو ما فيها وصخ حتى لو ما فيها ريحة .. لازم تتغير

بالنسبة لي انا ف انا اخصص ملابس خلال اليوم و ملابس وقت النوم

ف وش ما صار ما اجلس بنفس الملابس 24 ساعة

الجسم بطبيعته تموت خلايا و تحيا خلايا ، الخلايا الميته حنا ما نشوفها بعيننا المجردة. بعضها ممكن يعلق بالملابس ، لذلك التغير ضروري.

.

.

علاج حبوب الظهر

ازالة الاسباب او المسبب الرئيسي جزء مهم جدا من عملية العلاج

لكنها للاسف مو كل شي. بالغالب البشرة ما عندها القدرة انها تتخلص من الحبوب بالرغم من ان المسبب او المسببات تمت ازالتها.

العلاجات المعتمدة في علاج حبوب الظهر هي نفسها المعتمده في علاج بشرة الوجة و اللي سبق ذكرتها في تدوينة :

ملف خاص || البشرة المعرضة لحب الشباب

و كورس #تحدي_صفاء_البشرة

حطي في بالك ان انواع الحبوب تختلف ، بالتالي العلاج يختلف. حقيقة افضل نصحية اقدمها لك بهالخصوص انك تراجعين طبيب/ة يحدد نوع الحبوب ، و العلاج المناسب لها. من الممكن ان يكون عندك اكثر من نوع و بالتالي الوضع يتطلب روتين عناية معين.

.

.

استقبل اسئلتكم هنا في التعليقات