الحياة الجامعية

السلام عليك و على كل من اتبع الهُدى

الحياة الجامعية 

بنيتي ان هالتدوينة تفيد كل وحده بتواجهه الحياة الجامعية ، سواء هي الان بالثنوي و بتدخل الجامعة او هي الحين دخلت الجامعة 

الحياة الجامعية و الكشخة

ما تكون مدونة جمال اذا ما تكلمت عن الكشخة ، سواء كشخة اللبس او كشخة المكياج.
بعض الجامعات تفرض زي معين على طالبتها مقارنة بجامعات ثانية.
بجامعتي كان الزي مفتوح لنا ، او يمكن كان في نظام بس ما يطبق فعلا ×_×
اذكر مره شفت وحده بلوزتها تبين ذراعها كلها من الكتف لين اليد ... شافتها وحده من الموظفات - اساسا ماهو شغلها تراقب الملابس - بس مسكت البنت و قالت لها ما تبلسين مثل كذا. وقتها كنت اراقب المشهد و مو مصدقة اللي اشوفه ، كثير بنات غيرها شفت لابسين اسوأ بس محد قال لهم شي :/ 

اول اسابيع لي في الجامعة كنت فعليا اكشخ ، بس بعدها بفترة صرت اداوم ببجامتي تحت العباة .. كثر الله خيري بعد. ( اي جامعتي كانوا يسمحون لنا نلبس عباة بالحرم الجامعي ، اساسا في اماكن مثل المنطقة الخضراء كانوا يفرضون فيها علينا لبس العباة )
بالسنوات الاخيرة لي في الجامعة تركت - اساسا - البجامات و صرت البس ليقنز ، جيقنقز ، جنز ، بنطلون تحت العباة. بالرغم من اني اغلب الاوقات ما افصخ عباتي.
انت شوفي ايش جامعتك تسمح فيه ، و اعرفي نوعية العقوبات اذا خالفتي الزي. يفترض ان هالمعلومات تعطى لك في اول فترة دوامكم .. سواء ك عرض او ك كتيب او كلاهما.


اما من ناحية المكياج ... الموضوع مفتوح. ما سبق سمعت احد من جامعات ثانية قالوا للبنات خففوا مكياجكم او شي من كذا.
عندنا كان في كل الانواع من البنات ... الي نهائيا ما تحط ... و اللي تحط لدرجة انك تظنين انها رايحة سهره.
بالنسبة لي كنت وقت ما يكون لي مزاج احط على خفيف .. روج ، مسكرا ، و ارسم حواجبي. فكرة اني احط كريم اساس او حتى بيبي كريم ما كانت مناسبة لي ، اوقات ارجع من الجامعة على وجهه المغرب .. لو علي كريم اساس كيف بتوضأ و كيف بصلي ؟!
عموما انتِ .. شوفي اللي يناسبك و طبقيه ... جزء من الحياة الجامعية انك تكتشفين ميولك و اللي يناسبك. و اذا تحبين تحطين مكياج بس ما تبين تصيرين مهرج داخل في حفلة غلط .. شوفي مظهر مكياج اللامكياج makeup no makeup look  .. في باليوتيوب و في حتى مدونات عربيات كتبوا عنه.

الحياة الجامعة و الدراسة و الواجبات 

اشهر كذبة : " اتعبي بالثنوي ترتاحين بالجامعة " 

ههههههههههههههههه 

كلنا اكلناها :)) 

الدراسة بالجامعة تختلف تماما عن الدراسة باي مرحلة مختلفة ، مستوى اخر من الصعوبة. و ما اقول هذا حتى اخوفكم .. اقول هذا حتى يكون عندكم استعداد نفسي للاختلاف اللي راح تواجهونه. مثلا بالجامعة الاستاذ اهتمامه فيك جدا قليل مقارنة بالمدرسة. كتبتي ملاحظات او ما كتبي هذا شغلك ، خلاص انت وحده جامعية الان. سلمتي الواجب ما سلمتيه ، كيفك انت وحده جامعية الان. اختبرتي ما اختبرتي كمان ب كيفك ، انت وحده جامعية!

مع ذلك ، الاستاذة ينتبهون كثير للطلبة اللي يكتبون ملاحظات ، يشاركون بالحصة ، يسالون اسئلة ذكية ( مو اسئلة تدل على انك اساسا ما كنتي مركزة ) ، يجيبون درجات عالية ، يدخلون الكلاس بدري ، يسلمون الواجبات بالوقت المحدد. 

راح افصل اكثر بخصوص المعلمين ، لكن اللي يهمني هنا تفهمونه ان المسالة تختلف عن الثنوي. ما في احد يركض وراك على حضور الكلاسات ( في درجات تنخصم منك و ممكن يوصل الموضوع لدرجة الدكتور يطردك من الكلاس .. هذا النظام ماشي بجامعتي ماني متاكده بخصوص بقية الجامعات). ما في احد يركض وراك بخصوص تسليم الواجبات ، مافي احد يلزم عليك تكتبين ملاحظات لانها بعدين بتاخذ الدفتر و تصححه :) 

بما اني وضحت الاختلاف بين الدراسة في المدرسة و الجامعة ، ننتقل لامور مهم تعرفينها : 

عدد الساعات المدروسه

عدد الساعات المدروسه له تاثير كبير على تحصيلك ، في اشخاص لو مشوا بالضبط على الخطة الموضوعة راح يفشلون بكل المواد. في ساعات معينة شخصك الكريم يناسب له. اذكر في سنه من السنوات بالجامعة اخذت 7 مواد يعني ما يعادل 19 ساعة ! 

الحد الاقصى من الساعات عندنا في نظام الجامعة هو 20 ساعة. انهلكت انهلكت انهلكت !

حياة ما كان عندي حياة خارج اطار الجامعة ، اروح الدوام .. احضر الكلاسات .. ارجع من الدوام ، اذاكر ، احل واجبات ، مشاريع ... انام. حتى اهلي زين اذا شافوني وقتها. تحصيلي في الدرجات ما عانى ، بالعكس كانت اكثر سنة جبت فيها معدل عالي .. قبلها كان معدل 3.79 و طار لين 3.96 من اربعه! 

اذكر حالي بعد ما بشرت امي بنتايجي انهرت بكي ... اوك جبت هالنسبة العالية ، بس تستحق ؟! بكرة حرفيا لو اموت محد ذكرني بخير. وش بيقولون " والله كانت شاطره بدراستها" .. هذا الاثر اللي ابي اتركه ؟! طبعا لا ، و هالشي خلاني ابدا اخطط لسنواتي. 

عودة للموضوع ، الدراما :)) المذكورة مو عشان تعرفون اني دافورة هههههههههههه و لا عشان تعرفون عن المعناة اللي مريت فيها. الهدف الاول : الحصول على نسبة عالية ما هو بالامر المستحيل و راح افصل. الهدف الثاني : راعي وضعك الشخصي و النفسي ... كونك قدرتي تجيبين نسبة عالية هذا مو كل شي. الهدف الثالث : الجامعة مو كل شي ... لنفسك عليك حق ، لاهلك عليك حق ، للعالم عليك حق. 

من الامور اللي تهم في مسالة عدد الساعات المدروسه هي : 

هل المادة اساسية في تخصصك او لا ؟

هل الماده يعتمد عليها مواد ثانية او لا ؟

عدد الواجبات في المادة ؟ 

عدد المشاريع في المادة ؟ 

طبيعة المشاريع في المادة ؟ 

الاختبارات النهائية و كيف جدولها ؟

اذا المادة اساسية في تخصصك هالمادة يفترض بها ان تحتل اولية في تحديد جدولك. اذا المادة يعتمد عليها مواد ثانية - و اقصد بهذا ان المادة تفتح لك مادة ثانية - مثل مواد الرياضيات يتفرض بها ان تحتل اولوية بالنسبة لك .. اذا ما اخذتيها ممكن تتعطلين. 

بعض المواد واجباتها كثير لدرجة ان ما يمر اسبوع الا و في واجب .. هذه المواد ترهقك على المدى الطويل ، اذا بتاخذينها تحتاجين طوله بال.

طبيعة المشاريع في المادة ايضا تلعب دور في اختيارك ، بالنسبة لنا كان دائما في كل مادة يكون في مشروع جماعي و مشروع فردي لذلك فينا فينا ، لكن هالشي ممكن يتغير من جامعة ل جامعة. الاشخاص اللي تفضل الشغل الفردي تنزعج من العمل الجماعي ، و العكس نفس الشي. بعض المشاريع عملها ميداني ... ما تبي بس عرض او تسليم ورقة ، لا تبي شغل زيادة ممكن حتى بوقت فراغك تضطرين تعرضينه على الجامعة كلها. خوذي لك تصانيف عاد 

اعرف بعض هالامور ما تكون واضحة وضوح الشمس في كل الجامعات. بعض الامور محتاجة تسالين ناس ثقة. و اقول ناس ثقة لان في ناس مستعده تحرف في الحقائق بس عشان ما يجيها عين :/ 

قاعدة اكتب و احس اني اخوفكم من الوضع. لكني ااكد لكم ، كل هالتعب اذا تم توجيهه صح تحسين بمتعة. 

نظام الكلاس 

كنت بكتب النظام الصفي بس قلت اكتب كلاس تحسونه شوي مختلف عن المدرسة. 

هنا اقصد نظام الحضور و التاخر و الغياب ... الانسحاب و الطرد ، و اي قوانين اخرى. 

بالنسبة لجامعتي اول سنتين كانوا يزعجوننا بتذكيرنا بهالقوانين. بالرغم من اني شخصيا ما سبق حفظتها او حتى اخذت من وقتي شوي لحتى افهمها لاني فيما يتعلق بالتاخير و الغياب ما كنت اسويهم الا نادراً. و بما ان بالنسبة لنا الطرد متعلق بالغياب و التاخير فهذا كمان ما سالت فيه. 

الانسحاب سويه مره وحده بس ، وقتها كنت مع صاحبتي ، و اثنينتنا انسحبنا هههههههههه. وقتها ما كان معجبني معدلي في المادة ... بالرغم من اني كنت اذاكر و فاهمه زين لكن وقت ما اجي للاختبار ما كنت افهم شي. اكتشفنا بعدين ان الدكتوره كانت تاخذ اسئلتها من مصدر معين ، لذلك مستوى الاسئلة و مستوى شرحهها كان تماما مختلف. انسحبنا من عندها و اخذنا الترم اللي بعده عند وحده احسن منها و هالشي كان واضح جدا ب درجاتي. اخذت عندها A+ و هذيك لو قعدت عندها كان اخذت B حتى بدون البلس ههههههههه. و الثانية مو مسالة ان اسئلتها كانت سهله ، ابداً  ، بس كانت على مستوى شرحهها. الله يسعدها دنيا و آخره. 

الكتب 

بالنسبة لنا ، الكتب كنا نادرا ما نستخدمها. يقولون لنا جيبوا و جيبوا و اخر شي صفحتين من الكتاب بس نستخدمها :/ 

و ل جينا للصدق انا شخصيا وقت الدراسة ما كنت احب ارجع للكتب ، تجيب لي نوم. كنت اعتمد على الشرح ، الشرائح المستخدمه في الشرح ( السلايدز ) ، الملاحظات ( النوتس ) اللي كنت اكتبها ، و اوقات التسجيل الصوتي اللي سجلته. 

لذلك و بالسنوات الاخيرة بطلت اشتري كتب ، بالرغم من انها كتب تخصصي لكني عارفه اني ما راح اقرأها ، ليه خساير الورق و الفلوس ! 

تدوين الملاحظات 

خلال التعرف على الدكاتره ، في اشخاص من كثر ما حكيهم بطيئ و بنغمه وحده يجيبون لك النوم ، و في اشخاص من كثر ما حكيهم سريع تحسينهم سناب مسرّع! و الادهى من هذا كله اذا طحتي لك على شخص فاهم و عالم بس ما هو قادر يوصل لك المعلومة هههههههههه 

ب تدوين الملاحظات عندك خيارين اساسين : 

كتابة 

على الدفتر ، الجوال ، اللابتوب 

تسجيل صوتي

خيار الكتابة على الدفتر هو الافضل من ناحية ان الدكتور/ه يعرف انك مهتمه و تسجلين اول  ب اول 

الكتابة على الجوال ما هي عملية بنظري لان ممكن تتشتتين مع وجود البرامج او احد يراسلك 

الكتابة على اللابتوب عملية اذا كنتي سريعة بالكتابة ، و اذا كان حجم جهازك و وزنه قليل و لا يتعبك 

التسجيل الصوتي مفيد في حالة ان الدكتور/ه يقول شي جدا مهم. اما تسجيل المحاضرات كلها فهي فكرة بتوهقك بعدين. خصوصا وقت الاختبارات النهائية وش تسمعين و وش تتركين ؟! 

هذا غير ان بعض الدكاتر/ه ما يسمحون لك بتسجيلهم. شخصيا كنت اسجل - خفيه - لنفسي و استخدمها وقت الحاجة و بس ينتهي الترم احذفها. 

في طريقة ثالثة ، ما اعتبرها عملية ، هي تصوير الصبوره ( ي قدمي ). مناسبة وقت الزنقات الدكتور/ه توه/ا خلص/ت كتابة و انتهت الحصة و وراك كلاس او طلعه. او منت متاكده انك فهمتي ايش بالضبط قال/ت لكنك قررت تصورينها على ايه حال. 

الحياة الجامعية و التفوق الدراسي

الحصول على نسبة عالية ، ممكن و جدا ممكن. جدا ممكن تحصلين على A+. الموضوع محتاج منك ذكاء مو جهد. 

اذكر اول ما دخلت الجامعة ، كانوا المعلمين يقولون لنا مو لازم تحصلون على درجات كاملة ، بعضهم كانوا جدا مشددين لدرجة ان مسالة الدرجات الكاملة هذه مستحيلة بالنسبة لهم. برايهم الدرجات الكاملة يعني انك مثالية و هذا غير ممكن ههههههههههههه

المهم الموضوع اقدر احطه تحت مكونين رئيسين : 

الاول : متعلق بالمادة 

و ل هذا انصح بهذه التمارين  من مدونتي للتطوير : 

الاستعداد للامتحانات - د.احمد عمارة

نصائح للطلبة للحصول على درجات عالية

انا شخصيا طبقتها ، و كنت احصل على نتائج مبهره بالرغم من اني ما كنت ابذل ذاك الجهد. حتى في ايام الاختبارات النهائية ما كنت ابذل ذلك الجهد. باليوم اللي عندي فيه اختبار كنت اقل شي اتابع لي حلقتين من مسلسل و الحلقة الوحده على الاقل 45 دقيقة. 

الثاني : متعلق بدكتور المادة 

الغالبية ، من ملاحظتي ، ما تصنف الدكتور/ه على انه/ا انسان. هههههههههههه 

الدكتور/ه في نهاية المطاف انسان. اذا تقدره يقدرك. اذا ما تقدره ب تصرفات طفوليه كيف تتوقع انه يعاملك ب احترام. 

اساليب كثيرة اشوفها بالكلاسات تدل على عدم الاحترام : 

استخدام الجوال بكثرة 

تصفح المواقع 

الحديث الجانبي 

التاخر بالحضور للكلاس 

الدكتور انسان ، بناء على الانطباع اللي وصله منك راح يعاملك فيه. 

في تمرين كنت اسويه بداية كل فصل دراستي اتجاه كل اساتذتي الجدد ، اتوقع كنت التزم فيه لمده اسبوعين او شي ، لين اشوف نتيجة مرضية 

كنت اتخيلهم يبتسمون 

بس اتخيلهم يبتسمون 

لا اكثر و لا اقل 

و اجلس اتخيلهم لمده دقيقة 

حتى اللي ما سبق قابلته و ما سبق شفته اتخيله يبتسم ، الابتسامه ابتسامه ما يبي لها تفاصيل 

كل مدرس ، حرفيا كل مدرس ، كان يعاملني بطريقة جدا جميلة.

بما ان في منكم من القارئين لمدونتي للتطوير ، ف هذا التمرين يعمل على المستوى الذبذبي. 

الحياة الجامعية و الدكاتره

بالرغم من اني سبق حطيت و شرحت عن هالنقطة سابقا في اجزاء متقطعه. الدكتور بالاخير ... ما يبي اكثر من انك تبين له الاحترام. اظاهر الاحترام ياتي على شكلين : 

تقديرك لمادته 

تقديرك ل شخصه 

بالكلاس فكري اكثر من مره بخصوص تصرفاتك. المسالة مو انك في مكان دكتاتوري ، و انت مستضعفه. أبداً ، انت في موضع عزه. 

حطي نفسك في مكان الدكتور ، كم وجيه شاف اليوم ؟ كم وجيه شاف خلال الاسبوع ؟ كم وجيه شاف خلال سنوات تدرسيه ؟ كم شخص غش ؟ كم شخص اشتكى عليه ؟ كم شخص تلفظ عليه؟ ... من بين كل اللي شافهم ايش اللي يميزك ؟ ايش اللي يخليه يقرر انه يتعاون معك بالدرجات ؟ او بالتصحيح ؟ 

اظاهر التقدير - حسب تطبيقي الشخصي - ك التالي : 

التعليمات الموضوعه من قبله ، تؤخذ دائما بعين الاعتبار. اذا قال الكلاس الجاي تجون مراجعين .. تجين مراجعة. اذا قال الكلاس الجاي جيبوا معكم اجهزتكم تجيبين معك جهازك. 

^ اعرف ان اللي اقوله سخيف و بديهي. بس كمية البنات اللي شفتهم يسون العكس مهوله -_- 

دائما سجلي ملاحظات  حتى لو ما في شي يتسجل هههههههه 

اسالي اسئلة ذكية. الاسئلة الذكية هي اسئلة تدل على انك مركزه مع كل كلمة انقالت. 

اوقات اسمع لي وحده تسال عن شغله اوريدي انشرحت ، ودي اذبحها. المشكلة انهم من جدهم يجاوبون سؤالها هع 

كوني بالكلاس الوقت المحدد 

لا تطلعين من الكلاس الا للضروريات 

خلصي مشاريعك و واجباتك قبل ب فترة و اطلبي من الدكتور/ه مراجعتها. حتى لو رفضت قوليها شي مثل ابي شغلي يكون مثالي و يهمني اني اقدم شغل يرضيك. حتى لو ارفضت .. رسمتي بداخلها صورة عنك رائعه. نادرا ما تلقى احد يخلص المشروع قبل الوقت المحدد و يطلب مراجعة. 

الغياب للضروريات. و اذا غبتي ارسلي ايميل للدكتور/ه بانك ما راح تقدرين تحضرين. اذا سبب جاد اشرحي السبب . اما اذا قررتي تغيبين من حالك ل بالك احتفضي بالسبب لنفسك. 

الواجب اذا ما عرفتيه. راجعي الدكتور/ه في اوقات فراغه و اسالي. اذكر واجبات الرياضيات ما كنت افهم لها كلها. و كنت ع الاقل اجلس نص ساعة مع الدكتورة تشرح لي. لليوم تذكرني و تعزني. 

نزلي الجوال من ايديك. في دكاتره على فكرة من قوانين الكلاس تنقصك نص درجة على كل مره تشوف فيها الجوال بايدك :) 

الفرق بين الدكاتره الرجال و النساء 

من تجربتي الشخصية الرجال اكثر تعاون من النساء. الدكتور الرجال اذا شافك فاهمه و محترمه و شاطره لكنك بالاختبارات ما تجيبين زين ممكن يساعدك بالدرجات من تحت ل تحت. برايه لمجرد ان تحصيلك في الاختبارات ما هو زين ما هو مفترض انك تعانين في معدلك. شغال عندهم مفهوم : يسروا و لا تعسروا. 

بس النساء .. مستحيل :/ ، ما اعرف اذا هو عشان اننا نفس الجنس و بالتالي تحس كاننا ند لها ف ما تبي تساعد او كيف الوضع. يمكن لو وصلنا مرحلة ان النساء يدرسون الشباب نفهم الوضع اكثر. اتطلع اني اشوف طريقة تعاملهم. اقصى شي شفته حتى الان فيما يتعلق بالنساء هو عمل الكيرف ... ما اعرف لايش يتعرب. الكيرف ينعمل لما كلللل الطلاب بالكلاس تزيد درجاتهم ، درجتين او اكثر او اقل ... الدكتوره تحدد. عادة التحديد يكون بناء على اكثر وحده محصله درجات و تنزاد هي للحد المسموح. 

في البونسز ( زيادة )، فيها اشكال. في رجال يرفضونها و في نساء يرفضونها. البونس هي عمل اضافي له درجة معينة. يحدد العمل الدكتوره نفسه/ا. 

الحياة الجامعية و الصدقات 

العلاقات في الجامعة من اكثر الامور اللي حيرتني. كنت بسهوله قادره على اني ابرز نفسي للدكتور/ه. بس عجزت ارسم الخط الفاصل بين زميل ، صديق ، مصلحجي ، شخص ودود بس لا اكثر و لا اقل ، شخص اجتماعي يحب الهرج ... لين اخر سنة. و انا اخذت لي 5 سنين بالجامعة. لذلك ... اعطوا انفسكم الوقت ترسمون الحدود و تتعرفون عليها. 

اذا كنت من الصفوة المحظوظين بان صاحباتك من المدرسة - سواء كلهم او وحده بس - معك بنفس الجامعة و/او بنفس الكلية ، الف مبروك. تغبطين عليهم. 

من الامور المحتملة اللي تصير انك تقابلين اشخاص في كلاساتهم و تصاحبينهم و صاحبتك تسوي نفس الشي. من المحتمل ان صاحبتك ما تحب الناس اللي صاحبتيهم و انت ما تحبين الناس اللي هي صاحبتهم. لا تاخذين الموضوع بشكل شخصي. شخصياتكم قاده تنضج اكثر بالجامعة. قاعدين تنفتحون على مستوى اوسع من قبل ، ثقافات مختلفة و مذاهب مختلفة و يمكن حتى اديان مختلفة. 

اذا مو معجبينك منت مضطره تصاحبينهم ، اذا هي كمان مو معجبها ماهي مضطره تصاحبهم. الموضوع فعليا بكل هالبساطة. 

لمجرد انكم تعرفتوا على اشخاص ثانين ، ما يعني ان صداقتكم راح تنتهي. ما في اي داعي لاي وحده فيكم انه تعمل دراما على الموضوع. 

عموما الاشخاص اللي تتعرفون عليهم ما يتوقعون انهم يتعرفون على كل الشلة ، و بالغالب بالنسبة لهم الموضوع انت كافية ك صديقة ما هم محتاجين شلتك. 

اما اذا كنت من الجموع اللي تفرقت هي و صاحبتها ... ف ااكد لك منتي لحالك. دخلت جامعتي ما اعرف احد فيها. اول ترم قابلت اشخاص ب قيم مختلفه تماما عني ... احترمت قيمتهم لكن ما قدرت اصاحب احد فيهم. ثاني ترم كنت في بيئة افضل ، قيم افضل نوعا ما .. مازال في امور ارفضها ، لكني فترتها كان تفكيري

 " صاحباتي من المدرسة جداً رائعين و قيمنا متشابهه ، يمكن حنا صفوة من الاشخاص بهالقيم ، يمكن ما في احد مثلنا و يؤمن بنفس قيمنا ، معقولة يكون في احد بنفس قيمنا ؟! " 

جزء مني كان فعليا يآس من فكرة اني القى شخص بنفس قيمي ، جزء اخر كان متلهف انه يقابل شخص ب نفس القيم .. شخص يرجع لي الايمان. 

على نهاية الترم الثاني ، و بطريقة الى الان ما افهمها ... قابلت لي وحده بنفس قيمي. 

إلى الان كلما استرجع الموضوع .. كيف صرنا اصحاب ؟ ما اعرف ! ما كان بيننا اي تعامل نهائيا. حتى هي ما تعرف هههههههههه

لذلك انا - اقول - الاصحاب هم يلقوني مو انا اللي القاهم. 

بنفس الوقت .... في اشخاص - للاسف - مصلحجين درجة اولى. اصحابك وقت ما يحتاجون منك شي. تنتهي حاجتهم ... ما يعرفونك. هنا ما اتكلم عن الاشخاص اللي طبعهم منعزلين على انفسهم. اتكلم عن الاشخاص اللي الوقت اللي ما تحتاجك تحط عينها بعينك و تصد ! 

من الامور اللي عليك - برايي - تاخذين حذرك منها هالنوعية. و للاسف ما في طريقة تعرفينهم الا لما تجربينهم جد. 

لو بنصحك  في هذا الجانب : عاملي الناس ب صدق ب احترام ، لا تتوقعين منهم الكثير .. لا تتوقعين منهم اي شي من الاساس ، لا تتسرعين في الحكم على اي احد لا ك سيء و لا ك جيد - فيما عدى انك وحده تعتمدين على حدسك و يصدق معك - ، التفاصيل الخاصة فيك اللي ممكن تضرك .. احتفظي فيها لنفسك ( صورك ، اسرارك .. الخ ). 

الحياة الجامعة و النوادي 

غالبية الطلاب عندنا ما يهتمون بالانضمام للنوادي و هذا اكبر خطأ بحق انفسهم و حق حياتهم المهنية. بالفترة الاخيرة ، و مع كثرة التنافس فكرة ان شهادتك بنسبة عالية ما تكفي ! 

المسؤولين محتاجين دليل على انك كنت شخص ناشط في الحياة الاجتماعية مو بس فالح في الكتب و الدراسة. خصوصا ان في مجموعة تؤمن ان ذكي الكتب ما هو ذكي حياة ، و هذا بتاتا ما له اي اساس من الصحة. لان هي بالاخير مسالة تجربة و تعود.

النوادي Clubs يفترض انها موجوده في كل جامعة. من النوادي الاساسية : 

النادي الاعلامي 

نادي لكل تخصص ، مثلاً نادي إدارة اعمال. 

نادي التوستماستر 

نادي القراءة 

منت مضطرة تشاركين بكل نادي في الجامعة ، بس اقلها كوني عضوة لاحدها. بكرة اذا كتبتي في الريزمي حقك عن تجاربك تكتبين عن هذه التجربة. 

بعدين غالبية النوادي - فيما عدى التوستماستر - ما تتطلب منك انك تدفعين مقابل مادي. كل اللي تحتاجينه جزء من وقتك و جهدك انك تكونين عضوة. و يمكن حتى تفكرين انك تتشرحين لمنصب اعلى مثل الرئيسة. 

اذكر اول سنة لي فريت على كل النوداي و سجلت فيها هههههههههههه ، وقتها حتى وقتي ما كان يسمح ، مدري شلون كنت افكر. لكن غالبية الاندية ما استمرت فترة و سكرت بسبب قلة نشاط الاعضاء. احد النوادي كان مختص بالرقص ههههههههه حضرت معهم اجتماع واحد و طبقنا فيه رقصة من تصميم الرئيسة ، وقتها اكتشفت اني ما اعرف انسق ب حركات جسمي. انسحب منه بطبيعة الحال احسن من اني اكون العضوة الوحيده اللي صفر على الشمال. 

النادي الوحيد اللي استمريت معه من لحظة انضمامي لين تخرجي كان النادي الاعلامي. كنت الوجة التعريفي بالنادي في كل افنت ههههههههه 

عشوائيات 

انطباعي : آلة الطباعة DESKJET 2050A من اتش بي
_____
و عسى هالعيد ما يحمل لقلوبكم غير افراحه ♥
_____
#عادة_ديسمبر : التخيّل
______
كيف تعلمت اللغة الانجليزية + نصائح
________
الحياة الجامعية
_____
التصميم الداخلي : minimalist الحد الادنى
_____
كيف تستفيد من معرض الرياض الدولي للكتاب

و بس 

اذا قريتي كل حكيتي فانت بطلة و انا احترمك

اذا حابين تزيدون على حكي خوذوا راحتكم بالتعليقات 

اذا حابين تسالوني اي سؤال كمان خوذوا راحتكم بالتعليقات
- لكن لحد يسال شنو جامعتك ! -