تجربتي في الطلب من موقع كايلي جنر

السلام عليك و على كل من اتبع الهُدى 

تجربتي في الطلب من موقع كايلي جنر 

قبل فترة طلبت من موقع كايلي جنر ، هدية لوحده ♡
و وقت ما طلبت بحثت عن مصادر كتبوا تجربتهم الشخصية بالطلب من الموقع و ما لقيت اجابات تشفي
خصوصا الطلب للسعودية ..
لذلك اشوف ان كتابتي عن هالتجربة - و هو شي اول مره اسويه - مهمه و بتثري المحتوى العربي التعيس !
يكفي حلطمة و بسم الله نبدا



~~~*♡♡♡*~~~

طريقة الدفع في موقع كايلي جنر 

عندهم طريقة وحده بس للدفع و هي الكريدت كارد
سواء فيزا او ماستر كارد او امريكان اكسبرس

انا دفعت من خلال فيزا التسوق من بنك الراجحي

~~~*♡♡♡*~~~

طريقة الشحن في موقع كايلي جنر 

يشحنون عالميا و يشحنون للسعودية

شركة الشحن هي USPS

على فكرة في شركة تشببهم بالاسم بس مو نفسهم ف حطوا في بالكم

سعر الشحن العالمي 14.95 دولار

يعني تقريبا 52 ريال سعودي
( حطوا في بالكم ان السعر ممكن يصعد او ينزل )




~~~*♡♡♡*~~~

الطلب من موقع كايلي جنر 

بعد ما تختارين المنتجات و تضيفينا لعربة التسوق و تحددين لوين تبينها تنشحن و تدفعين يوصلك ايميل تاكيد الطلب

الايميل يشبهه التالي :

انا طلبت فجر الثلاثاء ( السهم الاول ) و وصلني التاكيد وقتها

السهم الثاني :  تحديد التاريخ ( بعدين بتفهمون ليه مهم )
السهم الثالث عنوان الشحن
( حذفت البيانات لانها ما تهمكم )
السهم الرابع بيانات الكريدت كارد
( حذفت البيانات لانها ما تهمكم )

بنهاية الايميل تلاقون اللي طلبتوه و سعره + سعر الشحن + المجموع الكلي بالدولار

السهم الاخير المجموع الكلي


وقتها كنت اظن ان بكذا اكون خلصت كل شي و الطلب خلص قاعد ينرسل

.
.

الا و اكتشف بعد اسبوع !!!! ان توهم يرسلون الشحنه

السهم الاول : يوم ارسال الشحنه ... الاثنين

السهم الثاني : تاكيد مره ثانية لمحتويات الطلب

السهم الثالث : عنوان الشحن

السهم الرابع : رقم تتبع الشحنه

السهم الخامس و الاخير : رابط لتتبع الشحنه



بعد ايميل تاكيد ارسال الشحنه الطلب وصل بعد 15 يوم 



~~~*♡♡♡*~~~

سلبيات مريت فيها ب تجربتي في الطلب من موقع كايلي جنر 

-الشحن تاخر و خلال الفترة الاولى ما كان في اي تاكيد

يعني من لحظة ما طلبت لين وصل الطلب اخذ الموضوع 22 يوم .. مو قليلة 22 يوم !
خصوصا ان فترتها كان توه طالع اشاعة عليها و على حبيبها ان عليهم قضايا مالية ... ف في بالي قلت بس بيسرقوني :"(

و بعدين حركتهم انهم نقعوني اسبوع من طلبت حركة غير مقبولة تماما



-شركة الشحن الاساسية اعطت الشحن للبريد السعودي

حركة اساسا ما لها اي داعي ، شركة تقط الشحنه على شركة ثانيه .. وصلوه انتم !
و كانه ما يكفي البريد السعودي ما يوصل الشحنه لباب بيتك ، مع ان العنوان متوفر عندهم ، حتى لو تدفعين له  ... الا اذا كان عندك حساب مسبق !
يعني انا راسلته ك هدية ... اقل شي توصل لباب البيت !

ما عندي خبره كبيره بالبريد السعودي تقريبا هذه ثاني تجربة لي معه بس صدقا ما احبهم.


طولت الشحنه بالجمارك 

ما اعرف ليه ، بسس وقتها طولت الشحنه بالجمارك. تقريبا يومين او شي مثل كذا مع انهم كانوا كاتبين لي ان الشحنه تم الموافقه عليها او شي مثل كذا

ما اعرف اذا هذا شي ثابت و دائم الوضع كذا لكن وقتها كنت نوعا ما قلقة بخصوص الوضع .. ف يمكن صغائر الامور كبرتها





~~~*♡♡♡*~~~

ايجابيات مريت فيها ب تجربتي في الطلب من موقع كايلي جنر 

وجود رقم تتبع

كون كان فيه رقم تتبع الى حد ما طمن قلبي ، اعرف هي تحرك ما تحرك ، وين وصلت و هل وصلت ... الخ


التعامل مع الموقع سهل 

ما في لعوزه و مرتب ، خصوصا اذا عندك لغة. اذا ما عندك لغة يمكن شوي يصعب عليك حاجز اللغة.
كمان قبل كنت اسمع ان الموقع كان يسكر من كثره الضغط عليه ، هالشي نهائي ما واجته.







~~~*♡♡♡*~~~

الشراء اون لاين 

تجربتي بالشراء من موقع يوباي
_______
تجربتي في الطلب من موقع كايلي جنر






عندك اي اسئلة ما جاوبت عليها في التدوينة ؟ اسالي في قسم التعليقات و حارد عليك باقرب وقت ممكن

اذا جربتي تطلبين من الموقع كيف كان تجربتك ؟ نقعوك مثلي :( ؟
( انا احس حركات النحاسه بس عندنا بالسعودية :p )