تحديث لتجربتي مع الليزر المنزلي

سلامٌ على من اتبع الهُدى 

هذي التدوينة مرتبطة بتدوينة

جهاز الليزر المنزلي فيلبس lumea precision plus

السوق فيه انواع ثانية  من الليزر المنزلي و اكيد منتج عن منتج يفرق بالنتيجة

التحديث مو بس تجربتي انا ، حتى العيلة الكريمة معي بما ان في فروق طلعت معنا
الله لا يخليني منهم


بسم الله نبدا 

بالمناسبة بامكانك الحصول على جديد التدوينات بالضغط على زر "انضام لهذا الموقع "

سرعة و مدى الاستجابة 

بين الاشخاص :

امي و اختي و اخوي ... كلهم الثلاثة سرعة الاستجابة عندهم كانت اسرع من عندي بفرق كبير
مع انهم بدوا بعدي !
اغلب الظن هو لاني كنت وقتها اخذ حبوب فيتامين و معادن ( هير دال )

بين مناطق الجسم :

بالنسبة لي انا
* كنت بحقق معهم بس ما هم الي يدققون *
في اماكن استجابت اسرع من اماكن ثانية مع اني بديتهم كلهم بنفس الوقت

مثلا كان عندي بين الحاجبين شعر

مو شي كثير لكن تعرفون شي بسيط مثل كذا يغير من شكلك تغير مو بسيط
و هو اصلا ما كان فيني و انا صغيرة بس فترة المتوسط كنت ادهن هالمنطقة فازلين :/ بعد ما اكون حطيته على رموشي .. و هاللي طلع لي شعر بهالمنطقة

المهم تقريبا خلال 6 جلسات راح
بقى شعر الوبري الي ما ينشاف الا بتدقيق و جهد جهيد


الساق عندي ( بدون الفخذ )

من ثاني جلسة بديت اشوف نتائج واضحة
لكن الغريب ان الوضع صار مساحة من الساق ما فيها شعر تماما
و جهات متفرقة ، كانها اقليات ، فيها شعر
و نفس الشي صار عند اختي
الي يشوفنا يحسبنا وقفنا بنص الحف
شكله جدا مضحك
بس من ناحية الجلسات اصير ما اضرب كل الساق ، بس اضرب بالليزر الاماكن الي فيها شعر

ايدي 

ايدي ما كنت اضرب لها بانتظام
هو مفروض اما مرة كل اسبوعين او مره كل شهر
بسبب الدوامات و لاني ما كنت ابي ايدي تحسس من الشمس
لان مفروض يوم كامل بعد ما تضربين المنطقة ما يجيها اشعة شمس
النتيجة تاخرت مقارنة بالساق
الحين ايدي مثل ساقي
اماكن فيها شعر و اماكن ما فيها الا شعر وبري يعني الا تقربين مره مره مره حتى تشوفينه

و نتيجة الشعر الوبري هذا هو اصلا نتيجة الليزر الصحيحة

المدة الزمنية 

المدة تختلف من مكان لمكان للشخص الواحد
و من شخص لشخص
بالنسبة لي شخصيا اقل مده كانت تقريبا 4 شهور اضرب فيها احيانا مره بالاسبوعين و مره بالشهر

الليزر للمنطقة الحساسة 

إذا كنتوا قريتوا التدوينة السابقة المنتج مكتوب انه لا يستعمل لكذا شغلة منها :

"

- على حلمة الثدي و المنقطة الداكنة حوله و الشفران الكبيران و المهبل و فتحة الشرج و داخل الاذن و الانف 

 "

انا ما حسب حساب لكلامهم و استخدمته للمنطقة كلها

طبعا بالعقل المهبل ما قرب له و لا فتحة الشرج

لكن الاستجابة بس كانت في المنطقة العلوية من العانة
ودي اشرح اكثر و افصل  بس ما ودي :)
ان شاء الله تكونون فهمتوا قصدي

المهم من بعدها بطلت اشتغل على المنطقة كلها ، ضياع وقت و جهد
صرت اشتغل على المنطقة العلوية بس ، الي يسمونها البكيني

شخصيا كنت ملتزمة به بالشهر مره ، ما بغيت اكثر ما بغيت اجازف و تسمر المنطقة علي
و خوفي من السمار مو من الليزر ، من الحلق

تدوينة الحلاقة || الحلاقة .. ما لها و ما عليها 

الليزر للوجة 

امي استجابتها كانت اسرع مني لليزر
مع اني كنت بادية قبلها
و خلصت قبلي باشواط

امي بشرتها حساسة ، لكن الحمدلله ما واجهت مشاكل وهي تستخدمه

بالنسبة لي انا واجهت مشاكل
للحق الغلطة غلطتي ما كان بسبب المنتج
لاني كنت مستعجلة قررت استخدم الراس الكبير المخصص للجسم
بدل الراس الصغير المخصص للوجة
بدت تطلع لي حبوب بمنطقة خط الحنك و كانت الحبوب مخيفة جدا
حمر و لا داخلهم زهم عشان اقول ينشف او اطلعه
و الاسوء انه الحبة لما تقرب "تموت" كان لونها يصير اقرب للبني المسود
طبعا وقتها ما كنت ادري ان السبب هو :))
ف يمكن شي ثلاث مرات على الاقل استخدمته على وجهي و لا عرفت الا بعدين
عشان اتخلص من الاثار استخدمت

انطباع | سيروم وايت اوبجكتف المفتح من بايوديرما

و

انطباع | كريم وايت اوبجكتف النهاري المفتح من بايوديرما

تعلموا من غلطتي و لا تستعجلون

إزالة شعر الليزر للرجال 

بالنسبة لهالمنتج بالتحديد فانه ممنوع على الرجال انهم يستخدمونه على الوجة
و مكتوب هالشي بالارشادات و حتى انا كتبتها باول تدوينة

في منطقة الابط اخوي استجابة الشعر اسرع بكثييييير مني
يمكن السبب لانه كل شهر ملتزم بالموعد و ينط عندي
مرتاح الشيخ اكيد بينط

اخوي عنده بين الحاجبين كثيف ، خلال تقريبا 8 جلسات اختفى وصار وبري

حاليا قاعد يقنع فيني اني اسوي له منطقة الرقبة بس انا رافضة
المنتج من الاساس كاتبين عليه انه ما ينفع لشعر وجة الرجال
لو على نفسي كان جازفت بس عليه لا

أضرار او آثار جانبية ل إزالة الشعر بالليزر 

1
تدمرت بشرتي 

استخدامي الخاطئ لراس الجسم لوجهي دمره
صحيح اني قدرت اعالج المشكلة
و ارجع ااكد الغلط غلطي
لكن من الاساس كنت اقدر اتفاداه لو اني ركزت شوي
اخوي بالرغم انه ما يدري عن السالفة ما يخلني اسوي لوجهه براس الجسم ، انا وش هبلني مدري :)


2
غمق ركبي 

اثناء استخدامي لليزر على ساقي ، غمق لي ركبي *-*
المشكلة كانت لاني ما كنت ارطب كفاية
مو عجز مني ما رطبت ، بس لاني كنت خايفة اني جسمي يتحسس من الكريمات بعد الليزر

كيف حليت الوضع ؟
بطلت اقرب الليزر له - خلال الفترة الاولى
قلت يقعد شعر و احلقه من فترة لفترة و لا يسود علي :(
اجتهدت ترطيب ، صرت ارطب مرتين باليوم

و رجع اللون :)

بعد ما رجع اللون بديت مره ثانية ليزر عليهم ، بس هالمره ما تحاشيت الترطيب
رطبت كالمعتاد ، مرتين باليوم




3
دوالي 

هم بالمنتج ذاكرين ان موانع الاستخدام للمنتج منها :

- تاريخ مرضي باضطراب الاوعية الدموية مثل الاصابة بالداولي او توسع الاوعية الدموية في المناطق المراد معالجتها 


امي - الله يطول بعمرها - عندها دوالي تجي و تروح
بالذات انها معلمة و توقف لفترات طويلة
بساقها من بعد ما استخدمت الليزر طلعوا لها :(
كنت على امل انه بعد فترة بيرجع كل شي لوضعه الطبيعي بس لساتهم ما راحوا
تقريبا طلعوا لها من بعد الجلسة الثالثة ، يعني مو على طول
و انا ما انتبهت لهم ( لاني انا كنت اسوي لها ) الا يوم هي سالتني
و انط والا اتذكر مانع هالاستخدام :(

انا نفس الشي ، مع ان ما سبق ان كان عندي دوالي
جوني صغيرات ، بساقي اليسار بس
عموما ساقي اليسار انا دائما اضغط عليها ، ف بالبداية ما توقعت انه منه
و انا متاكدة ان هالضغط ساهم في تطوير هالحالة بالنسبة لي
للحق ما هم شي يخوف مره ، ي دوب كم عرق
بس حبيت اذكره من باب التوضيح

حتى الان هالمشكلة ما لقيت لها حل ، بالغالب اذا لقيت لها بكتب عنها تدوينة منفصلة


4
اسوداد البط + رائحة كريهه 

" نفر " مننا لما عمله سود معه الابط و طلع معه ريحة كريهه
للحق ما اعرف ليه ، مخططين نحجز له موعد جلدية و نشوف السبب
بس هو الوحيد من بين اربع الي هالنتيجة طلعت معه

قريبتي استخدمت ليزر عيادات و نفس الشي صار معها
و قالت لي انها تعرف كذا وحده صار معها نفس الشي

كمان صديقتي قال ان نفس الشي صار مع قريبتها


مو متاكدة من السبب
بس يمكن في اشخاص يتحسسون منه

التخلص من الشعر تحت الجلد 

اتوقع هذا اغرب شي ممكن تسمعونه
امي عندها شعر تحت الجلد ، و الشعر تحت الجلد نوعين

واحد يكون اذا قشرتي الجلد ( و يمكن جرحتي نفسك ) تطلع لك شعره كاملة
^ و غالبية النصائح في المواقع عن هالنوع

و واحد ثاني تكون الشعره كانها واحد مع الجلد ، كان الشعره مسام !
و ذكرت هالشي بالتدوينة السابقة

امي عندها الثاني ، و اذكر لما كنت امر بالليزر على المناطق الي فيها كان يوجعها اكثر
لان الليزر يضرب الغامق ( هذا اساس عمله ) و لانه مستوي مع الجلد يضربها بطبقة داخلية
* على الاقل هذا تحليلي الشخصي *
و كنت اخفف الدرجة عليها

المهم امي بالرغم من محاولاتها المتواصله الشعر ما قدرت تطلعه !!
ما طلعه الا هالجهاز *-*

مستوعبين امي صار لها سنين و سنين تحاول توخره ما كان يرضى
ما راح الا بعد فضل الله  ثم فضل هالجهاز


لكن و للاسف المشكلة رجعت لها مره ثانية :(
<< ليه تعلمينا من الاساس اجل :/
العلم نور



الامور الي سبق ذكرتها بالتدوينة الاولى مثل الشحن ما راح ارجع اطرحها مره ثانية


~~***~~


حطوا في بالكم ان الليزر المنزلي انواع
انا ذكرت هالنوع

lumea precision plus

عندنا بالسعودية بالاسواق متوفر نوع ثاني - ما اعرف شي عنه غير شكله -
و بالخارج في انواع اكثر

قبل ما تشترون اقروا الارشادات
و ركزوا على :

الاماكن الي مو مسموح فيها
موانع الاستخدام
طريقة الاستخدام
مدة الشحن
عدد الضربات في الليزر

اخر شي تبين تسوينه انك تشترينه لغرض معين و اخر شي ما تقدرين تستخدمين لهالغرض !






~ توافيق