سلامٌ على من اتبع الهُدى
تدوينة اليوم عن منتجات الي خلصتها
بصراحة كنت مفكرة اسوي من السنة الي فاتت بس ما كنت متشجعة
يعني تصوير اشياء منتهيه للمدونة مو مثل عرضها في فيديو باليوتيوب
التصوير فيه تركيز اكثر ، يبيني البلاوي اكثر :$
عكس الفيديو الناس تركز على الشخص و الي يقوله من انها تركز ع المنتج ، يكفيها تحفظ اسمه
ع الاقل ذي وجة نظري
لكن على الرغم من كل هذا هالنوع من المواضيع برأيي جدا مفيد
الشخص يقدر يشكل راي واضح لما يكون استخدم المنتج للاخير
يكفي مقدمة
بسم الله نبدا
و بالمناسبة يسعدني لو تنضمون للمدونة بضغطكم على الزر الازرق ( انضمام لهذا الموقع )
كريم وايت اوبجكتف المفتح النهاري من بايوديرما
الكريم سبق حكيت عنه بالتفصيل الممل هنا
و مثل ما انتوا شايفين مخلصه منه علبتين
المنتج ما يخلص بسرعه ، يعني تقريبا يقعد معك شهرين مع الاستخدام مرتين باليوم و وضعه على - تقريبا - كامل الوجة
المنتج استخدامي له ينحصر في تفتيح التصبغات من الحبوب
ما اذكر بالضبط سعره بس ما هو رخيص
المنتج يستهال كل ريال يندفع فيه
واكيد راح اشتري منه مره ثانية
* اصلا اوريدي عندي علبه بكرتونها *
و انصح فيه
* اصلا اوريدي عندي علبه بكرتونها *
و انصح فيه
بايو اويل
هالمنتج الي احدث ثورة و ضجة ما يستحقها
المنتج من كثر ما هو ينقاله صالح لكل شي و علاج تقريبا لكل مشكلة احترت في ايش استخدمه فيه
بعد فترة لما استخدم الليزر و بسبب اني اهتملت الترطيب عندي الركب سمرت زيادة
وقتها قلت هو منتقذي
خرطي !
طل !
عموما لون ركبي رجعت مثل ما كانت بعد فترة و لا كان له اي دور اساسي او حتى ثانوي في هالموضوع ، الترطيب ( الي التزم فيه بعد استحمام ) رجع لي الوضع سليم
اعتبره من المنتجات الي ما تستحق الشراء و من المنتجات الي ما تستاهل يندفع فيها ريال واحد
لا طبعا ما راح ارجع اشتريه و لا انصح فيه احد
كريم حمام زيت للشعر من خلاصة العسل - كريم كاب
شخصيا انا متعوده على منتجات كريم كاب بالحجم الضخم
استغربت لما شفت هذا ، يعتبر كتكوت عندهم
اصلا من وين جابته امي مدري
المنتج يوعد بترطيب و ترميم الشعر و يترك الشعر سهل التسريح و يحميه من عوامل البيئة المؤذية و يمنحة اللمعان الطبيعي و القوة
اما من ناحية الاستخدام فهو مثل طريقة استخدام غالبية البلاسم ، تحطينه على شعر نظيف رطب لمدة 5 دقائق او لمدة 15 دقيقة للي ترغب بالترطيب العميق
المنتج مو معجزة و لا مميز باي شي
اي فعلا يرطب لكن ما يبهر مثل حمام ماكديميا او حمام ويلا
بنفس الوقت المنتج مو سيء
المنتج معتدل ، يودي الغرض لكن لا تتوقعين معجزات منه
شخصيا ما راح ارجع اشتريه و لا انصح فيه
زبدة الجسم شيا
احب هالزبدة من بودي شوب
احب ريحتها
تعرفون شعور لما تشم ريحة شي و تعجبك جدا لدرجة ودك انها تصير ريحتك المميزة الي كل الناس تعرفك فيها ؟ ريحة هالزبدة هذا بالضبط شعوري اتجاهها
للاسف ريحتها مو ثابته
حجم العبوة 200 مل و سعرها 69 ريال سعودي
للحق المنتج يخلص بسرعه
يعني اذا انت مثلي تتحممين كل يوم توقعي خلال وجيزة انك تخلصين العلبة
و مقارنة بالسعر الموضوع ضربة انك تدفعين كل شهرين 69 ريال
ما نختلف اجسامنا تستحق كل العناية الي نقدمها لها و يمكن حتى اكثر
بس للي ميزانيتهم محدوده الموضوع خط احمر
بالنسبة لي ما عندي مشكلة ادفع هالقيمة
من ناحية الترطيب ، المنتج كمان مو معجزة ، يعني اذا عندك مشكلة جفاف ما ادري اذا راح يعالجها لك او لا ، مع انهم للعلم ذاكرين انها للجلد الجاف جدا .. مو بس الجاف لاء، الجاف جدا!
طبعا راح ارجع اشتري المنتج ، اصلا اوريدي عندي علبتين جداد بقراطيسهم
و انصح فيه
لوشن مفتح للجسم بخلاصات طبيعية -بيزيلين
هالمنتج شرته لي امي وقت ما وصيتها على منتجات محدده
اتوقع العاملين الي بالصيدلية اقنعوها فيه و مدحوه لها و هي خمته لي
حبي لها امي
المرطب لوشن
يعني اخف قوامه من المرطب الي متعوده عليه
و اخف حتى من الزبدة
لكن من ناحية الترطيب فهو ما يقل عنهم جودة
ما اعجبني من ناحية ان المنتج لونه ابيض ابيض
مثل بياض بعض واقيات الشمس ، ان شاء الله عرفتوا قصدي
وقت ما كنت ادهنه على جسمي كنت احس اني يبي لي افرك صح عشان ما يترك لون ابيض
مع لوني فاتح ما ادري الحنطاويات و السمر اذا بيترك عليهم اثر او لا :/
اللوشن يناسب البشرة الحساسة
اللوشن فيه مواد طبيعية مثل حامض اللبن و فيتامين سي
يستعمل يوميا بعد الحمام
العلبة صغيرة ، ما اعرف بالضبط الحجم بس ما بين 100 الى 200 مل
و للاسف ما اعرف السعر
لا ما راح اشتريه
انصح فيه للي بشرتها حساسة او الي تدور عن مرطب جديد
منتجات بيزلين بطلة جدا
متوفر بالصيدليات
زيت للشعر - ماكاديميا
الزيت على وشك الانتهاء ، اتوقع استخدامين و يخلص
بصراحة طول معي
العبوة بحجم 125 و سعر 175
العبوة زجاج سميك
و ضغاط ( في نوع اخر بخاخ )
برايي المنتج استحق كل ريال اندفع فيه
حرفيا كل ريال
شخصيا شعري مو اي شي يناسبه ،
و للحق ما استخدم الزيت لحاله ،
استخدمه بطريقة معينه اتوقع راح احكي عنها بتدوينة الاسبوع الجاي
المنتج ريحته هبال ، تجنن ، عشق
لكن للاسف ما تثبت
جد ودي اعرف طريقة اخلي فيها الروائح الي احبها تثبت
شخصيا استخدم المنتج للتصفيف ، لكن هو كمان يستخدم بعد الاستشوار و ايضا مع البلسم او الماسك . للشعر الرطب او الجاف
المنتج هذا تحديدا زرت فرعين لنزية ( المحل الوحيد الي يوفره على حد علمي ) و لا لقيته :(
لقيت النوع الي بخاخ
حتى الان ما جربت البخاخ ، ف حقيقة ما ادري اذا نفس المفعول او لا
راح اشتريه لو لقيته
و انصح فيه
شامبو للقشرة الجافة - ديوري
هالشامبو هو منقذي من بعد سنوات من " الصراع " مع القشرة
اول مره قدمت هالشامبو في المدونة كان في تدوينة التعامل مع القشرة
المنتج بالنسبة لي شي اساسي في عنايتي بشعري
طبعا راح اشتريه
للحق انا مستغربة ان ما عندي باك-اب
و انصحه لكل وحده عندي مشكله بالقشرة الجافة
شامبو القشرة squanorm من DUCRAY
مزيل الرائحة - بيزلين
هذا من حسن الحظ خلص امس
عاد طرت و صوره قبل ما ارميه
صار لي شهور مجمعه هالشعب و ما صدقت اني ارميهم يجي هالمفعوص يبقى عندي ؟ لاء!
المهم منتجات ازالة روائح العرق مو كلها تناسب جسمي
احط منها و لا كاني احط
سواء طبيعي و الا مصنع
لكن منتج بيزلين ناسبني
يؤدي الغرضمن ناحية انه " ينقي و ينير منطقة الابط " ما شفت شي :/
ف اذا تفكرين تشترينه لهالشي ما اظنه ينفعك
اي راح ارجع اشتريه ، اصلا اوريدي فتحت الباك-اب
و لو اني حاليا افكر اشتري من فيتشي .. خصوصا انها طبيه مثل بيزلين و يمدحون فيها
اتوقع مزيلات العرق تفضيل شخصي و مناسب لاجسام اكثر من اجسام ف حقيقة اذا لقيتي شي يناسبك لا تغيرين لكن اذا ما لقيتي انصحك تشترين و تستخدمينه و تشوفين مدى ملائمته لك
منظف ديب كلين - نيتروجينا
شخصيا جدا احب منتجات نيتروجينا
اشوف الي تحط فلوسها على منظفات نيفيا او منظفات كلين اند كلير قاعده تستثمر فلوسها غلط
منظفات نيتروجينا لا يعلى عليها
خصوصا اذا بشرتك مختلطه او دهنية او عندك حب شباب
اصحاب البشرة الحساسة و البشرة الجافة يمكن تلوق ظالتكم عند نيفيا او عند كلين اند كلير
بس الي تبي منظف ينظف من قلب تستخدم من نيتروجينا
هالمنظف ما فيه شي مميز
يعني ينظف كما هو المطلوب
لكن ما يزيد عن كذا
يعني لا تتوقعين شي مثل انتعاش او غيره
قوامه تقريبا هلامي
يتحول لصابوني سائل مجرد ما تفركينه بايدك مع شوي ماء
انصحك تفركين المنتج بايدينك اول و بعدين تحطين على وجك
كثر الضغط و الفرك على الوجة مو زين
ما اظن راح ارجع اشتريه مو لانه سيء بس لان نيتروجينا بين كل فترة و فترة تجدد و تطور من منتجاتها
و لاني حابه اجرب غيره ف على بال ما اكون شريت شي جديد يكون هذا طار
زيت لافندر اساسي - ديورنس
العبوة زجاجية
سعتها 10 مل
ب 50 ريال سعودي
اللافندر من الروائح النفاذة
*الحين مع ان المنتج مخلص كلما فتح الغطاء ريحته على طول توصلني بدون ما اقرب له *
مع ذلك هي من الروائح المهدئة للاعصاب
و حلو استخدامه قبل النوم
احط من المنتج نقطين او ثلاثة على ماء الفواحة و اتركه
للحق ما اعرف كثير بزيوت الفواحات ، ذا اول استخدام لي
مدة استهلاك المنتج يعتمد على حجم الفواحة و الفترة الي تتركينها فيها تشتغل و تكرار استخدامك للمنتج
عموما شركة ديورنس من الشركات الفخمة
يعني حتى العلبه حاسبين حساب انها ما تتاثر بالضو فمخلينها بلون غامق
ما ادري اذا راح اشتريه او لا -_-
اتوقع اذا رحت مره ثانية لديورنس و شفت الروائح عنده راح اقرر
انصحه للي جدولها مزحوم ، للي عندها مشكلة بالتوتر ، للي عندها مشكلة ارق .. انصحها باللافندر بالذات
شمعه - زهور الريف
انا بشكل عام مدمنة شموع
شموع زهور الريف او لي فيرجي le verger ( اسمه بالفرنسي، الفرنسين مدري شلون يحكون :/ ) من الشموع الي احبها جدا
و قبل فترة مدحتها بالانستقرام
مازلت عندي مدحي لها ولو ان فيها بعض العيوب
ليش احبها ؟
روائحها بالتركيز المناسب ، لا هي قوية مره و لا هي خفيفة مره
و هالشي بالنسبة لي جدا مهم
كوني وحده اصدع و نفسيتي ممكن تنقلب اذا حولي روائح قوية
تشكيلتهم بالروائح مبدعة و تميزينها باللون
عيوبها ؟
المنتج ما تقدرين تحرقينه للاخير !!!
شايفين بالصورة باقي جزئية بسيطة من الشمع باقية
اذا تركتيه يحترق للاخير راح يكمل يحترق لين يكسر لك العبوة !
حرفيا يكسرها و تعالي لقطي من وراه
عيب في التصنيع ان خيط الشمع ما يقصر حجمه لما يقرب من الاخير
على عكس الشمعه الي راح احكي عنها بعد شوي
و هالشي يخلي العبوة تنكسر + يبدا يدخن و سوي لك هاللون الاسود من فوق
فكرت انظفه قبل ما اصور بس قلت لا خليني اوريكم الحقيقة عشان ما تنصدمون اذا قررتوا تشترون بناء على مدحي
شغلة ثانية
المنتج ما يكتبون عليه اسم الرائحة ، فاذا اعجبتك ريحة معينة احفظي لون الشمعة ، لان اللون هو الطريقة الوحيدة الي تميزين ، هم عندهم خط رائحة لكل منتجاتهم ( عطور ، كريمات ، شموع .. إلخ ) باقي المنتجات يكتبون عليها الا الشمعة ما يكتبون :/
شموع زهور الريف في لها حجمين ، هذا الحجم الكبير
اذا تبين تشترين اصبري لين وقت التخفيضات يصير سعر الحجم الكبير مثل سعر الحجم الصغير سابقا
بس تنزل التخفضيات راح اشتري و اكيد انصح فيها
شمعه - بانجالو رقم 9
اسم الماركة غريب ، اول مره اسمع فيه و لا عليه مدح كثير
موقع bungalow no 9
الشمعة شريتها لما كنا في ايكونك iconic
هالمحل ما احبه و جودته بالملابس الله بالخير :/ >> مبين الي منكب
المهم كانت فترة تخفيضات و اهلي خموا لهم ملابس من هنا و من هناك ، و انا افتر اشم ريحته هالشمعة
حب من الشمه الاولى
ههههههههه
لا جد جد !
ريحة الشمعة غريبة جدا و مميزه جدا
الريحة على وصف العلبة فيها اوراق المانجا و اليوسفي
الرائحة كلما اشمها اقع في غرامها مره ثانية
بالمناسبة انا نيقة جدا في موضوع الروائح ، مو اي شي يعجبني و حتى اذا عجبني ما في شي يضمن انه راح يستمر يعجبني و ما اكره مره ثانية
ادري الله يعيني على نفسي :$
ف كوني تعجبني ريحة حتى بعد ما خلصتها ذا يعتبر في قاموسي نوع من انواع الاعجاز
المنتج جاء مع غطاء ، للاسف رميته بالزبالة :/
سعرها 50 ريال سعودي
المنتج عيبه ان اذا طيفي النار يدخن
انا عن نفسي ما كنت امانع انه يدخن بس امي تكرهه لما يدخن
و للحق ترا تدخينه مو بسيط
لما اقول ادخن ما اقصد ان الغرفة تصير كانها فيها ضباب او عج لاء !
اقصد انك تشوفين خيط دخان يطلع منها
كل الشموع تسوي كذا بس هذا حبين مبالغ فيه
بس يحق له بعد عمري يتدلل
ولو اني اكره المحل بس راح ادخل و ادور على الشمعه
و انصح فيها
~~***~~
و بكذا خلصنا الموضوع
كنت ناوية اشمل اشياء مثل ماء ورد و امور اخرى بس ما كان في شي يميزها لا سلبا و لا ايجابيا بصراحة عشان احكي عنها
تويتر :
~~***~~
انستقرام :
@aroundfab
~ توافيق
ما شاء الله
ردحذفحطيت عيني على الوايت اوبجكتف ان شاء الله اجربه في اقرب فرصة
وانا مثلك احب زيت الشعر المكاديميا ، استخدامي له طواري بس احب شعري معاه
يعطيك العافية و شكراً على الفائدة اللي قدمتيها لنا ❤️
حيا الله هيا
حذفمنتج يستحق الوايت اوبجكتف
يعافي ربي ()*