خطوات عمل بروتين الشعر بالبيت : فيديو + بالتفصيل الممل

السلام عليك و على كل من اتبع الهُدى 

خطوات عمل بروتين الشعر : فيديو + بالتفصيل الممل 

هذه التدوينة تابعة لتدوينة سابقة : 

تجربتي مع بروتين الشعر في البيت

اسم المنتج المستخدم :

MoeHair all in one hair repair system red formula for strong and very curly hair

او اختصاراً 

MoeHair Gold Treatment

انصحكم تشوفون التدوينة ، حتى فعليا تقررون اذا المنتج يناسبكم او لا 

ادوات بروتين الشعر 

راح تحتاجين 

1- فرشاة توزيع ، متوفره عند غالبية المحلات الي توفر للمشاغل. الموجود بالصورة شريته من نزية 

2 - مشط نحيف. جدا مهم للتوزيع و ايضا خلال مرحلة السرمكة. ايضا متوفره عند غالبية المحلات الي توفر للمشاغل. انا شريته من نزية 

3- سيراميك شعر يصل لدرجة حرارة 470-450 فهرنهايت على الاقل. يعني 230 - 240 مئوي. اذا ما تعرفين حقك يوصل لاي درجة ادخل الموقع الام و تاكدي. درجة الحرارة مهمة في العملية ، فكروا فيها مثل عملية الخبز .. اذا حار جدا احترق عليك و اذا بارد ما انخبز. 

اللي بالصورة شراه اخوي - اتوقع - من النهدي. ما فيه شي مميز للحق. بالعكس مسكته كبيرة و تتعب. اذا كنتي بتشترين شي جديد تاكدي ان حجمه يكون صغير. و ما اقصد صغير من ناحية الطول ، اقصد صغير من ناحية العرض. نزية شفت عندهم واحد حيل نحيف.

4- صحن تحطين فيه المنتج. مو لازم شي فخم ، انا استخدمت صحن بلاستيك مقعر 

5- سفرة او شي مشابه حتى ما تتوصخ ملابسك و انت تشتغلين على نفسك او ملابس اللي انت تشتغلين عليه. 

6 - قفازات لك. شخصيا ما استخدمتها ، بس بعد ما انهيت الجلسة لاحظت تاثير المنتج على ايدي و لا حبيته. 

7- استشوار هواء .. ما اشوفه ضروري لكن خلال العملية هم ناصحين فيه. اشوفه ضرر زيادة على الشعر. لكن اذا كنت مستعجله راح يفيدك.

و طبعا الاهم و المهم هو 

8 - بروتين الشعر  :) 

طريقة عمل بروتين الشعر 

فيديو عمل بروتين الشعر 

الخطوة الاولى 

اغسلي شعرك تماما من اي بقايا زيت او كريم مصفف او اي شي ثاني.

اغسلي شعرك باي شامبو مو بالضرورة الشامبو اللي هم موفرينه لك 

لا تستخدمين بلسم !

شامبو بس 

الخطوة الثانية 

اترك شعرك يجف حتى 70% 

تقدرين تتركينه يجف طبيعي من هواء ربي و هذا اللي شخصيا افضله 

او تقدرين تحطينه بفوطه و تعجلين جفافة 

او تقدرين تستخدمين استشوار هوائي 

راجع لك الخيار اولا و اخير 

الخطوة الثالثة 

قسمي شعرك الى 4 اقسام  متساوية 

التقسيم راح يسهل لك توزيع البروتين 

و تاكدي تمشطين الشعر 

اذا شعرك " صعب " التعامل معه استخدمي اول المشط العادي 

بعدين استخدمي المشط النحيف 

الخطوة الرابعة 

ابداي ب قسم قسم 

و من الاسفل اختاري خلصه من هذا القسم و و باستخدام الفرشاة حطي عليها بروتين الشعر 

بعدي عن فروة الراس مسافه نص سم 

بعد ما تحطين البروتين ، باستخدام المشط النحيف وزعيه على باقي الخصلة 

( شوفي الفيديو ) 

طبعا تقدرين تبدا من فوق ل تحت ، بس راح يكون متعب و مبهذل 

المشط هنا راح يساعدك توزعين باقي المنتج على الخصلة 

النقطة المهمة هنا : 

كيف اعرف اني حطيت كمية مناسبة على شعري ؟ مو كثير و لا قليل ؟

الاشاره اللي انا شخصيا لاحظتها هو ان لون شعرك يصير نفس لونه لما تغسلينه بالماء ؛

طبعا هذا مثبت في حالة اصحاب الشعر الغامق.

اما الشعر الفاتح مثل الاشقر و البلاتيني للاسف ما اعرف.

تعرفين انك كثرتي اذا وقت الخطوة السادسة  تلقين شعرك يطلع منه دخان. هذا اشاره الى انك كثرتي.

هل هذا راح يضر شعرك او راح يخرب النتيجة ؟ لا ، بس الرائحة شينة لدرجة انك راح تحتاجين تفتحين مصادر تهوئة 

اذا كان قليل ما راح يعطيك نتيجة مرضية 

الخطوة الخامسة 

انتظري 15 دقيقة حتى تسمحين للمنتج انه " يثبت" على الشعر و ينشف 

للحق ما اعرف الحكمة من هالخطوة ، بس ما انصحك تتنازلين عنها

بالفيديو الاصلي للعملية و حتى في التوجيهات على العلبة ينصحون باستخدام مجفف الشعر ، انا ما استخدمته. 

الخطوة السادسة 

وقت استخدام السيراميك على الشعر 

تاكدي ان السيراميك على الدرجة المطلوبة 

و اللي هي : 230 - 240 مئوي

و بعد كذا نمسك خصلة خلصة و نسرمكها 

تذكري حرارة السيراميك عالية 

لذلك افضل طريقة انك تسرمكين شعرك فيها هي طريقة التتبع 

كتبت عنها ب سبويلي هنا : 

chase method طريقة المتابعة لسرمكه الشعر

و هذا فيديو سريع لها :

السر فيها انك ما تتركين المشط ينزل من ايدك 

متعبة اذا اول مره تسوينها ، لكن مع الوقت راح تنقذك ! 

كم مره تمررين السيراميك على الخصلة ؟ 

15 مره ، و لا تزيدين 

و تعملين هالشي على كل خصلة بشعرك حطيتي عليها بروتين الشعر موهير 

الخطوة السابعة 

خصلتي كل شعرك 

نعيماً 

الان عندك خيارين : 

الاول تغسلين شعرك مباشرة ( ما انصحك ) 

او 

الثاني تنتظرين ثلاثة ايام و تغسلينه ( انصحك بشدة ) 

~~***~~

من الامور اللي يهمني اذكركم فيها

1

 هو انكم تراجعون التدوينة السابقة : 

تجربتي مع بروتين الشعر في البيت

و تشوفون اذا النتيجة هي اللي تبونها او لا 

2

انا مو قاعدة اسوي دعاية ل موهير ، اصحاب المنتج ما دروا عن ارضي من سماي 

3

حاليا هذا هو المنتج الوحيد للبروتين اللي استخدمته. ما اعرف عن باقي الشركات و المنتجات. 

4 

النتيجة النهائية ( الي تبين بعد ما تغسلين شعرك ) لا تشبه بتاتا النتجية النهائية الموضحة بالفيديو

النتجية قد تختلف من شعر ل شعر

شعرك راح انعم مما سبق 

و شكله اكثر صحه 

لكن ما راح يكون مثل اصحاب الشعر الدهني 

.

.

.

العناية بالشعر 

الصبغ باستخدام excellence mousse من l'oreal + نصائح عامة
_____
تقنية لوك لتصفيف الشعر { الجاف و المتعب و الاجعد } L.O.C. METHOD
_____
تقليم الشعر ( المتقصف) مع المحافظه على طوله
____
التعامل مع القشرة ~
_____

عناية لشعرك تليق به ~

_____
تجربتي مع بروتين الشعر في البيت
_____
خطوات عمل بروتين الشعر بالبيت : فيديو + بالتفصيل الممل
_____
كوني خبيرة تجميل شعرك : الخطوة الاولى : مسامية الشعر
___________
كوني خبيرة تجميل شعرك || الخطوة الثانية : سماكة الشعر
_________
تطويل الشعر في اسبوع – طريقة الانقلاب
_______
شامبو big من لش lush
______
chase method طريقة المتابعة لسرمكه الشعر
_______
بديل الزيت من بانتين – علاج ملكي للتلف
__________
بديل ارخص : قناع مكاديميا
______
ملف خاص : تساقط الشعر
______
ملف خاص : تقصف الشعر
______
ملف خاص || القشرة
_____
العناية بالشعر المصبوغ : 3 اعداء لصبغة شعرك
______
شطف الشعر بالعسل
_____
تقنية أنتوني موروكو لقص الشعر القمرية
_____
الشامبو الجاف من باتسيت_____
شامبو القشرة squanorm من DUCRAY 

اكيد اي اسئلة ، تفضلوا بالتعليقات