مدونة حنين للجمال ♥ AroundFab: جلسة عناية مكثفة لقدم ناعمة كالأطفال

سلامٌ على من اتبع الهُدى

العناية بالقدم : جلسة عناية مكثفة لقدم ناعمة كالأطفال

هالتدوينة صار لي فترة افكر اكتبها بس كل مره تتاجل

و حتى يوم جيت اكتبها كل شوي انشغل :/

ما علينا

انا اعترف اني مقصرة بحق رجولي كثير

بالنسبة لي هالطريقة هي الي تحسسني اني اعطيها حقها الكامل بعد كل التقصير الي تمر فيه

بسم الله نبدا

بالمناسبة بامكانك الحصول على جديد التدوينات بالضغط على زر "انضام لهذا الموقع "

قبل ما اشرح جلسة العناية و الي بالمناسبة ما تاخذ وقت كثير بالاستعداد احب انبه

اذا عندك مشاكل جلدية في القدم عالجيها اول قبل ما تفكرين تطبقين هالحكي

او اذا عندك فطريات في احد او كل اظافرك عالجية اول ، خلصي الكورس العلاجي ، و بعدين طبقي هالحكي

تطبيق هالحكي راح يزيد الموضوع بالنسبة لك سوء

هالجسلة تتكون من مرحلتين

الاولى

جلسة بوديكير

الثانية

جلسة الترطيب

نبدا ب 7 امور الي راح نحتاجها

- وعاء عميق ، يغطي قدمك اقلها للكعب

- ماء حار ، للحد الي تقدرين تتحملين

- مبرد قدم ، ما انصح الي يكون حديد ، حقي شريته من زمان من عند ذا بودي شوب و بطل

- فوطة

- كيسان ، اثنان ، ممكن اكياس زبالة - تكرمون - او اكياس طعام بحجم كبير

- فازلين

- شربات ، يفضل قطن ، الشربات السود النسائية الطويلة ما تفيد مره

ذي كل الاساسيات

و تكفي لصنع المعجزات

طبعا تقدرين تتفنين زيادة بجلسة البوديكير مثل ما انت حابة

و تزيدين عليها مثلا املاح او تستخدمين جهاز تدليك

~~~***~~~

الخطوات

قبل ما نبدا يُفضل انك تغسلين رجولك بماء و صابون

بس من باب اننا نتاكد ان الرجول نضيفه

نقعِ قدمك بالماء مدة 10 دقائق

هذا على الاقل

راعي ان الماء يكون اقرب للسخونة

بس مو عاد شي يحرق

جففِ رجلك بالفوطة

هالخطوة مهمة اذا كنت تستخدمين مقشر القدم الي ذكرته فوق

اذا ما نشفتي رجلك و استخدمتي مقشر القدم من ذا بودي شوب راح يعلق الجلد به :(

شخصيا ما احب و لا افضل حجر الخفان و هو يعتبر البديل الافضل لمقشر القدم ، احسه ما يفيد و لا يقشر صح مثل هذا

ارجع اقول مقشرات القدم الي حديد اجرام

افركِ باطن قدمك بمقشر القدم

له وجهين واحد منهم اخشن من الثاني

هذه الجهة الخشنة :

الجهة الناعمة ما تفيد بشي صراحة

افركي بقوة متوسطة ، الجلد الي ناشف على طول راح يطيح معك على الارض

لا تحاولين تتهورين و تفركين ظهر قدمك ، راح تجرحين نفسك

حتى لو فكرتي تستخدمين الجهة الانعم راح تجرحين نفسك

افركي الكعب ، و لا تنسين الاصابع

تخلصين من قدم ( خلنقول انها اليمين ) ترجعين تحطينها بالماء

و تطبقين الخطوة الثانية و الثالثة للقدم الثانية ( خلنقول انها اليسار )

و بس تخلصين منها ترجعين تحطينها

و تطلعين قدمك اليمين و تطبقين عليها للمرة الثانية الخطوة الثانية و الثالثة

تخلصين منها ؟ ممكن تكتفين او ممكن ترجعين تدخلينها بالماء ، راجع لك

و تطلعين رجلك اليسار و للمرة الثانية تطبيقين عليها الخطوة الثانية و الثالثة

تخلصين منها ؟ ممكن تغسلينها بالماء او تكتفين بكذا و تنتقلين للخطوة الرابعة

ما انصحك بالتكرار اكثر من مرتين

و لاننا ندخل القدم اكثر من مره حطي في بالك ان الماء مهم يكون دافئ لما تدخلين فيه رجلك للمرة الثانية

* هذه طريقتي بالبوديكير *

دهن المرطب

ذكرت فوق فازلين

و شخصيا ما اشوف في افضل منه لترطيب القدم

و ادهني منه كمية كريمة على رجولك

يستاهلون بعد كل كمية هالتقصير بحقهم

البسِ الاكياس

ايه قريتي صح

البسيهم مثل ما تلبسين الشربات

البسِ الشربات

بعد ما لبستي الاكياس البسي فوقهم الشربات

يُفضل انك تسوين هالجلسة بالليل

بحيث بس تخلصين كم دقيقة و تحطين راسك على المخده نوم

يصير بس تصحين من النوم رجولك مثل الزبدة

اكيد تقدرين تسوينهم بالنهار بس راح يزعجونك كلما تحركتي

خوش

* ينقالي اقلد الصوت *

و كل من في البيت درا عنك

مره سويتها قدام بعض ناس ماتوا ضحك

بس عاد ما دروا عن الزين والا ما كان ضحكوا :/

~~***~~

بعد ما تخلص المدة

تشيلين الشربات و الاكياس

و بعد كذا تغسلين رجلك بالماء

~~~***~~~

بدائل :

الفازلين : زيت زيتون ( ما سبق استخدمته )؛ لانه اكثر الزيتوت ترطيب و مناسبةً لهالجلسة

الاكياس : اكياس زبالة ، اكياس طعام كبيرة الحجم ( الي للسندويش ) ، اكياس بلاستكية

مقشر القدم : حجر الخفان ( ولو اني ما اشوفه بذيك الفعالية ) ، آلات التقشير ( ما سبق استخدمتها )

~~~***~~~

ملاحظات :

- طريقة البوديكير الي ذكرتها ما تشمل العناية بالاظافر من ناحية قص و تنظيف لها لان حسيت انه شي الكل يعرف عنه

- اذا تطبقين طريقة بوديكير مناسبتك و معجبتك مو لازم تغيرين لحقتي حتى تستفيدين من هالجلسة ، تقدرين تسوين طريقتك الي ترتاحين عليها و بعدها تبداين من الخطوة الرابعة

- اقل مدة زمنية حتى تشوفين نتائج فعالة هي ساعة ، هذا و حطوا في بالكم في اشخاص اجسامهم بطبيعتها حاره فمعهم راح تطلع النتائج اسرع من غيرهم ، خصوصا عكس الاشخاص الي اجسامهم باردة

- اكثر مدة زمنية هي 8 ساعات ، و بشكل عام اكثر من 12 ساعة ما انصح ، بتخمج ( تعفن ) رجلك

^ القاعدة : لا إفراط و لا تفريط !

- هالطريقة ممكن تسوينها مرتين بالاسبوع على الاكثر !

اكثر من كذا ابدا ما انصح

و بين المرتين تقريبا يومين او ثلاثة

- حتى تحافظين على النتائج كل ليلة رطبي قدمك بفازلين

- حطي في بالك ان الطريقة تعتمد على اننا نقشر الجلد الميت بطريقة معقولة و آمنة و بعد كذا نتبعها بجلسة ترطيب عمييييييقة

يعني ما ينفع تحطين ترطيب و الجلد الميت متكوم طبقات

حدّث العاقل بما يعقل

- بالرغم من اني مقصرة بحق رجولي لكني ما امشي حافية على السراميك .. دائما اكون لابسة سلبير ( شبشب منزلي ) و بيتنا ما به فرش اطلاقا فرجولي ما تحتك به

ولاني من النوع الي امشي بالحوش

تقصيري هو من ناحية اني ما ارطبها

- ارجع اكرر عندك مشاكل جلدية في القدم او مشاكل فطريات في الاظافر لا تسوين هالجلسة ، عالجي اول عند طبيب جلدية و بعدها طبقي ، تطبيقين راح تزيدين الموضوع سوء

- إذا عندك مشاكل في احتباس الماء او تعرفين ان ساقك ممكن تنتفخ اذا لبستي الشربات ، سوي هالجلسة و انت صاحية ، لا تنامين عليها و كل شوي انتبهي لنفسك ، و انصحك اولا و قبل ما تطبقين انك تستشيرين طبيبك