سلامٌ على من اتبع الهُدى
 |
| إستعدي للعيد من رأسكِ حتى اخمص قدميكِ |
كثير اسباب خلتني اتاخر بهالتدوينة
و للحق وصلت مرحلة الغيت فكرة كتابتها
بس الفكرة فرضت نفسها علي لانه
" لا يوجد اقوى من فكرة حان وقت تنفيذها "
بسم الله نبدا
بالمناسبة بامكانك الحصول على جديد التدوينات بالضغط على زر "انضام لهذا الموقع "
هذا الاستعداد هو استعدادي الشخصي للعيد
و لو دققتوا بتنتبهون انه مفروض يكون روتين يومي دائم لك
في امور راح احدد لها منتج معين و في امور راح اترككم على راحتكم
تحديدي لمنتج ما يعني بالضرورة ان هو الوحيد و الافضل ، لكن يعني اني اثق فيه
و تركي للامور بدون تحديد هو لاني حتى الان ما وجدت المنتج الي " اقسم به " على قولتهم
قبل ما اكمل انا حاليا قاعدة استخدم مجموعة منتجات و حاطتها تحت الاختبار
طبعا ما راح اذكرها
اقولكم بس عشان اذا جاء الوقت الي اكتب بها انطباعي ما تنفجعون و تستغربون :$
~~~***~~~
الجسم
غالبية مشاكل الجسم تنحل بشوي تقشير و ترطيب مضاعف
1
كل يوم قبل الاستحمام تعملين
تقشير جاف لجسمك
تكلمت عنها هنا
و بالمناسبة ترا شريت وحده من ذا بودي شوب افضل 10 مرات من الي ذكرتها بالتدوينة
شخصيا اطبق الطريقة الاولى لان نيتي هي التقشير مو تحفيز الجهاز اللمفاوي او التخلص من السيلولايت
لكن الي تبي تقدر تطبق الطريقة الثانية
2
مرتين بالاسبوع
تقشرين جسمك
اختاري المقشر المتوفر
فرك معتدل
3
الاستحمام يكون بماء اقرب الى البرودة
شخصيا ما افهم الناس الي تحمم بماء ساخن
الماء البارد علاجي للجسم
في قصة ايوب لعلاجة من مشاكله الجلدية
{ ارْكُضْ بِرِجْلِكَ ۖ هَٰذَا مُغْتَسَلٌ بَارِدٌ وَشَرَابٌ }
مغتسل بارد !
سالفة انو تقارنين جسمك بقدر به دهون و تحتاجين موية حاره عشان تطلع ما تدخل مخي
4
الترطيب
استخدمي المرطب الي يناسبك
حاليا قاعدة استخدم زبدة الشيا ، نشوف وش يصير معها
قبلها كنت استخدم فازلين الموحد للجسم
و قبل زبدة من ذا بودي شوب
في الترطيب ترطبين جسمك مرتين !
يعني ترطبين اول ما تطلعين من الحمام ، نعيما
و بعد تقريبا 12 ساعة ترجعين ترطبين
ادخلي الحمام و تدهني مره ثانية
اذا ما تقدرين ترطبين كل جسمك لسبب او لاخر على الاقل اكتفي بترطيب الاماكن الاكثر جفافا بجسمك
مثل الركب و الاكواع
~~~***~~~
الاطراف
هنا السهل الممتنع
كل ليلة قبل ما تنامين حطي على ايدينك مرطب
و على اقدامك الكريمة فازلين
و اتركي عنك الجوال ;)
مرة بالاسبوع على الاقل سوي لقدمك جلسة عناية مكثفة
و الي بالمناسبة كتبت عنها قبل يومين
في العناية بالاظافر اعدائك
- الجفاف
- الماء بشكل مبالغ فيه
- الاسيتون
- المواد الكيماوية
- العنف
الحلول بسيطه
لا تتعرضين للماء بدون حاجة
البسي قفازات اثناء غسل الملابس و المواعين
رطبيهم دائما
ابعدي عن مزيلات المناكير باسيتون
ابعدي عن فتح العلب باظافرك ، ترا كلها اظافر ما يسوى عليها
و اعداء اظافرك هم نفسهم اعداء ايدينك
لايدك مره وحده بالاسبوع اعملي جلسة عناية مكثفة
تقريبا نفس الي للقدم
لكنها هنا اكثر اختصاراَ
قشري ايدينك بمقشر
ادهني عليها اما كريم قوامه ثقيل مثل جولسليد
او زيت ثقيل مثل زيت زيتون
و البسي كيس او قفاز
و خليه بالكثير مده ساعة
اكثر من ساعة مو زين يطري الاظافر بشكل مبالغ فيه
الوجهه
قبل ما توصلين لاي نتيجة تبين مهم تعرفين وضعك الحالي
و هل هو منطقي الي ترغبينه ، بالمدة الي حددتيها
الالتزام قادر على انه يصنع المعجزات
من الاساسيات
- الغسول اليومي المناسب لبشرتك
- المرطب ، يُفضل انه يكون ثقيل قوامه بالليل
علاجات :
في حالة عندك تصبغات و حابه نتائج سريعة :
في النهار استخدمي
تكلمت عنه هنا
في الليل استخدمي
تكلمت عنه هنا
في حال عندك حب شباب
تدوينة : حبوب بوجهك ؟ اعرفي الاسباب راح تفيدك و توضح لك الصورة اكثر
اضغطي هنا
بشكل يومي او يوم بعد يوم ( يعني يوم ايه و يوم لا )
انصحك تسوين قناع العسل ( عسل بس )
تكلمت عنه و عن فوائده هنا
و حطي منه على شفايفك كمان
مرتين بالاسبوع على الاكثر
استخدمي قناع منقي/منظف
من الاقنعة المنقية الي احبها هو قناع الطين
الي عندي اخذته من الصيدلية قطع و دقيته و حطيته علبه
و اخذ شوي و اخلطه بماء الحنفيه لحتى ما يصير متماسك
و امده على وجهي و ابعد عن منطقة العيون
بس ينشف كله اغسل وجهي
مهم بعد كل قناع منقي انك تحطين قناع مرطب مثل قناع العسل الي ذكرته فوق
في حالة ان وجهك باهت
على مدار اليوم
بخي على وجهك ماء ورد
ماء الورد ينور الوجهه
لكن عيبه انك تحتاجين تحطينه على وجهك على مدار اليوم + تحتاجين تلتزمين فيه
تتركينه يرجع وجهك مثل ما كان
انا حاطته ببخاخ
و تقريبا ابخ كل ساعه على وجهي
تقدرين تحطينه على قطنه و تمسحين وجهك به ، بس مع الوقت بتستثقلينه و تستصعبينه و تملين
بينما بعلبة بخاخ اسهل و اكثر عملي
في حالة انك جرحتي وجهك او فقعتي حبه او شلت شعر وجهك
استخدمي فيوسودين ، الي بخط برتقالي
اذا عندك الي بخط احمر استخدميه فترة الليل فقط و لا تستخدمينه لفترات طويلة لانه فيه كرتزون
الفيوسودين يستخدم 3 مرات باليوم
لمده يومين إلى ثلاثة
في حالة ان عندك هالات تحت عينك
من ما عنده اصلا!
استخدمي زيت لوز مرّ تحت العين
اختاري شركة ثقة
اكيد حطي باعتبارك ان السهر له دور اساسي بالعملية
في حالة جفاف شفايفك
حطي مرطب ثقيل قبل النوم
و لما تصحين فرشي شفايفك بفرشاة حتى يروح كل الجلد الميت
اذا ما نفعت معك هالطريقة
خلال اليوم ، استخدمي مقشر و فرشاة اسنان و افركي شفايفك بها
لا تتحمسين مره
مرطب بيزلين بشمع النحل بطل ، انصح فيه
~~~***~~~
الشعر
قبل فترة كتبت تدوينة عن عناية لشعرك تليق به
موجوده هنا
ادري مكثرة روابط بس ما يصير ارجع اقول حكي اوريدي حكيته :/
المشاكل الشائعة
حل القشرة
القشرة استخدم لها هذا
Squanorm Shampoo dry dandruff
و الي سبق حطيته ب منتجات انهيتها
حطوا في بالكم لمجرد اني استخدم هذا مو معناته انه راح يناسبك حتى و ان كان عندك مشكلة قشرة مثلي
ليه ؟
لان القشرة انواع و اسباب مختلفة ، حكيت عنها بالتفصيل هنا
حل الجفاف و البهتنان
قناع للترطيب و التغذيه :
مرتين بالاسبوع
عسل + زبادي ( ذولي اساس )
ازيد عليهم زيت سمسم ، زيت السمسم يطري الشعره و ينعمها
و ازيد عليه بلسم ( اختياري )
المكونات ما فيها كمية معينه او نسبة معينة
المهم ان كمية الزبادي تكون اكثر من العسل عشان ما يصير دبق بزيادة
و كمية الزيت تضاف تدريجيا حتى ما تصير الخلطه مرررره سايحة و تقرفين من عمرك
تنحط ربع ساعة و تغسل
الخلطة تنحط على الشعر و تتركز على الاطراف
مو على فروة الراس و الجذور
الفروة مو محتاجة منك ترطيب
في حالة ان شعرك نحيف ( تقدرين تعرفين من تدوينة عناية لشعرك تليق به )
زيدي على المكونات مايونيز او موزة او ماسك شعر فيه بروتين
لا تخافين الريحة ما راح تثبت اذا غسلتي زين
ادري ودكم بشي لتكثيف الشعر و تطويلة بس ما عندي شي اكيد
و لما اقول ما عندي شي اكيد اقصد اني ما استخدمت شي اكيد يكثف و يطوله
قبل كم سنه استخدمت زيت الدكتور لعبد الباسط السيد لتطويل الشعر ، بس ما اضمن تلقونه و تلقون اصلي
تكلمت عنه هنا
بس كان قبل فترة وحده قالت لي ان كل الارقام عطلانه او ما تشتغل
بعد الغسل انا شخصيا استخدم تقنية لوك
انصح بها للي شعورهم جافة و يعانون منها
اهل الشعر الدهني ما راح تفيدكم اطلاقا
تكلمت عنها هنا
التغذية :
نادرا ما اتلكم بالتغذية في مدونتي لاني و بالدرجة الاولى انا ما اطبق الا القليل
اعرف بس ما اطبق
عشان كذا دائما اقول لكم المعلومة مو قوة تطبيق المعلومة هو القوة
ما علينا
1
الماء
ادري انبثروا من سالفة الماء
كلما احد نصح قالكم اشربوا ماء
عن نفسي الاحظ التغيرات ببشرتي لما تقل نسبة شربي للماء
تقل هاه
مو تنعدم
اعرف ناس يمر اسبوع و لا تشرب ماء ، اعتمادها على السؤال الاخرى
قلة شرب الماء تخلي جسمك يكافح و كبدك تتعب و صدقيني ما تبين كبدك تتعب !
اصحاب البشرة العطشاء .. ما يبين فيهم العجب
لو يحطون مرطبات ، خلطات ، و بلاوي ما يبين فيهم
2
مع الكبد
اجسامنا خلال فترة الصيام تزيد قوة سبحان الله
حتى الكبد و الي صحتها مهمه جدا تقوى
لكن المشكلة ان الغالبية يفسدون في الليل عمل النهار باكل المقليات
الكبد اذا شغالة صح ما يصير في بجسمك بقع ما يصير شعرك باهت
لو تقرون اكثر عن الكبد و عملها كان تقدسون كل شي يقويها و يقوي عملها و تهجون عن كل شي يتعبها
الكبد لما تصير مثقله بالدهون و السموم تتعب و يقل عملها و تعفس بشرتك و شعرك
صار لي فترة قاعده استخدم مشروب يقويها من ضمن اشياء اخرى
لكني ابي اكمل 90 يوم عشان اشوف الفوائد صح
~~~***~~~
التلخيص
للوجه:
النهار
- غسل الوجة
- كريم التفتيح
- مرطب
خلال اليوم
ماء ورد ( ببخاخ )
الليل :
- غسل الوجة
- قناع منقي/منظف ( مرتين بالاسبوع )
- قناع العسل ( يوميا او يوم بعد يوم )
- كريم التفتيح
- مرطب
للجسم :
- تقشير جاف ( يومي )
- تقشير بمقشر ( يومين بالاسبوع )
- الاستحمام اليومي
- ترطيب الجسم مرتين باليوم
للشعر :
- شامبو لعلاج القشرة
- قناع العسل و الزبادي للشعر ( مرتين بالاسبوع )
- تقنية لوك
للاطراف :
- جلسة عناية مكثفة للقدمين ( مره- مرتين بالاسبوع )
- جلسة عناية مكثفة لليدين ( مرة - مرتين بالاسبوع )
- ترطيب اليدين و الاظافر قبل النوم
- ترطيب القدم قبل النوم
~~***~~
الامور الي ما تطرقت لها معناته ما اعرف لها
و افضل ان تروحين لدكتور بخصوصها
~~***~~
جزء من العناية هو ازالة الشعر الغير مرغوب فيه
في حالة انه للوجة :
بنفس اليوم لا تستخدمين قناع منقي
المنطقة نظيفة تماما لا كريمات و لا غيره
و بس تخلصين ادهني وجهك بفيسودين البرتقالي
في حالة انه للجسم
احرصي قبله بيوم تكونين قشرتي جسمك زين
المنطقة نظيفة تماما لا كريمات و لا غيره
إذا كانت من المناطق الحساسة ادهني جسمك ب سودوكريم ، و الي راح يساعدك ان المنطقة ما تلتهب او تسود
اما اذا كانت غير كذا ادهني بمرطبك العادي
~~~***~~~
الاسنان
في حال انك تبين تبيضين اسنانك
تحتاجين تبداين من الان تقطعين القهوة بكل انواعها
و تحرصين على انك تفرشين اسنانك مرتين باليوم
و يبقى عندك خيار انك تفتحين اسنانك عند دكتور
او بالبيت باستخدام منتجات كريست و الي حكيت عنهم هنا
و الي صراحة ما كانت تجربة محببه بالنسبة لي
او تقدرين تبيضينهم بطريقة طبيعية باستخدام السحب بالزيت ( او المضمضة بالزيت )
و حكيت عنه هنا
من ناحية التبيض امور مثل استخدام بيكربونات الصودا فهي جدا جدا مدمره للاسنان ،
و تقلب اسنانك حساسة
حساسة من البارد
حساسة من الحار
و ادناة الدون توجعك
عناية بالبشرة
__________
_________
_____
___
____
____
_____
____
_____
______
____
____
____
____
_____
_______
______
_____
______
_____
_________
____
____
____________
_____
_____
______
_____
____
________
______
____
_____
______
____
_____
______
____
_____
______
______
_____
_____
_____
______
______
____
_______
_______
_____
_____
______
_____
___________
______
________
_؛_______
____
_____
_____
~ توافيق
ليست هناك تعليقات:
إرسال تعليق
شاركيني رايك ♥